Македонија
Ѓорѓиевски: Нов кабинет по информатика за ООУ „Невена Георгиева-Дуња”

Учениците од ООУ „Невена Георгиева-Дуња“ од денес наставата по информатика ќе ја следат во помодерни и посовремени услови. Градоначалникот Ѓорѓиевски го посети ова училиште, каде што во функција е ставен новиот кабинет по информатика. Мултимедијалната училница е опремена со компјутери, паметна табла, магнетна табла, обезбеден е и нов мебел, анатомски обликувани столчиња, со што ќе се зголеми удобноста за работа и ќе се создаде попродуктивна работна атмосфера. Се работи за инвестиција обезбедена преку донација од Француски институт – Скопје, како и приватната компанија „Алумил“ и Уни банка, кои на овој начин ја покажаа својата општествена одговорност.
„Интензивно работиме на унапредување на условите за основците од Кисела Вода, секојдневно создавајќи им можности за помодерен пристап во наставниот процес. Денес, во функција го ставаме новоопремениот кабинет по информатика во ООУ ‘Невена Георгиева-Дуња’, кој целосно го опремивме со техничка опрема. Учениците на располагање имаат компјутери, кои се мрежно врзани, печатачи и скенери, на располагање имаат и паметна табла, како и нова магнетна табла, со што даваме можност за унапредување на нивните ИТ-вештини. Претходно, ова училиште беше опремено и со интерактивен панел, кој веќе активно се користи во наставниот процес. Тој беше донација од француската амбасада.
Нужно е формалното образование ги следи новите технологии и методи, особено кога денешницата вели дека изборот на дигиталните професии е вистински и сигурен избор во овој момент. Воедно, направивме и ентериерно уредување, обезбедивме нов мебел, квалитетни и ергономски компјутерски столчиња, што секако ќе обезбеди подобра работна атмосфера. Сакам да им се заблагодарам на Францускиот институт – Скопје, на приватната компанија ‘Алумил’ и на Уни банка бидејќи ги препознаа и ги следат нашите благородни заложби за креирање стручна, едуцирана младина, која ќе може да одговори на потребите на пазарот. Оваа нивна донација е вистински чекор во таа насока“, изјави градоначалникот Ѓорѓиевски, кој додаде дека претходно ваков кабинет за информатика им беше обезбеден и на учениците од ООУ „Круме Кепески“, а за сите основни училишта во Кисела Вода во повеќе наврати се обезбедуваа дигитални табли и паметни телевизори.
Во ООУ „Невена Георгиева-Дуња“ настава следат 618 ученици. Покрај повозрасните, кои предметот информатика го имаат во повисоките класови, новиот кабинет по информатика ќе го користат и учениците од одделенската настава, кои работа со компјутери изучуваат од трето одделение.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Поддршка од министерот за правда за Пандов чијашто куќа беше запалена: „Случајот бара одлучна акција“

Министерот за правда Игор Филков најостро го осудува палењето на куќата на директорот на Управата за извршување на санкции, Александар Пандов и бара одлучна акција во која ќе се утврдат причините и најстрого казнат можните сторители.
„Најостро го осудувам палењето на куќата на директорот на Управата за извршување санкции, Александар Пандов. Му давам целосна поддршка во неговата истрајност и борба против криминалот и корупцијата. Овој случај како и неколкуте други случаи поврзани со лицата вработени во УИС и затворите, бараат одлучна акција во која ќе се утврдат причините и најстрого ќе се казнат можните сторители“, вели Филков.
Директорот на Управата за извршување на санкции, Александар Пандов, претходно, на социјалните мрежи објави дека му бил запален домот. Нема да не запрат и нема да не поколебаат, напиша тој.
Македонија
Кирков: Вработените во ЗОО последно земале февруарска плата

До Стефан Кирков, којшто е член на Советот на Град Скопје, пристигнала молба од вработените во скопската Зоолошка градина и барање за реакција и помош. Го известиле дека последна плата која ја земале е фебруарската плата и одтогаш немаат никакво примање.
„Веќе сме мај, а овие вработени се оставени без примања и навистина сум запрепастен до каде ќе се оди со непрофесионалноста во ова раководство на Градот и кадрите кој ги поставува?! Вработените од утре ќе бидат и без здравствено осигурување !!! Поминаа празници како 8ми Март, Рамазан Бајрам , Велигден на праг е и 1ви Мај а вработените се оставени и заборавени замислете да им се исплати плата !!! Цели фамилии страдаат од нечија непрофесионалност!“, напиша Кирков на социјалните мрежи.
Тој ги проѕва Град Скопје , Данела Арсовска и Зоран Попов сигнализирајќи и дека состојбата може да доведе до протести.
Македонија
Реконструкција на водоводна мрежа и проширување на мостот на Маркова Река, најави Општина Аеродром

Општина Аеродром најави дека во наредниот период започнува со целосна реконструкција на водоводната мрежа на улица 2 во Долно Лисиче, а исто така се започнува и реализација на проектот за проширување на мостот на Маркова Река што ги поврзува Долно и Горно Лисиче.
Тендерските постапки и за двата проекта се во финална фаза и се очекува наскоро, по нивното комплетирање да се почне со реализација на терен.
„Водоводната мрежа на улица 2 во Долно Лисиче за првпат од нејзината изградба добива целосна реконструкција при што старите и дотраени цевки ќе бидат заменети со нови и пошироки инсталации во должина од околу 1 300 метри. Со ова конечно се става крај на повеќедеценискиот проблем со водоснабдувањето што го имаат жителите во овој дел од Аеродром“, соопштија од Општината.
Наредниот период Општина Аеродром започнува и со реконструкција и проширување на мостот на Маркова Река, меѓу Горно и Долно Лисиче.
„Мостот се наоѓа на многу фреквентна сообраќајница и токму заради зајакнување на безбедноста во сообраќајот се врши реконструкција со проширување на овој мост, со што би се добило побрз проток возилата, но она што е уште позначајно е дека ќе се зголеми и самата носивост на објектот“, се наведува во соопштението.
Реконструкцијата на водоводната мрежа и на мостот,додаваат од таму, се два капитални инфраструктурни прокета од витално значење, особено за жителите на Долно и на Горно Лисиче, и се финансиски поддржани од Владата.
Вкупната вредност на реконструкцијата на водоводната мрежа изнесува 15.457.871 денар, додека вкупната вредност на проширувањето на мостот е во висина од 12.066.494 денари.