Македонија
(Видео) Јанакиески побарал увид во доказите за крвавиот четврток
Околу триесетина минути траеше распитот на поранешниот министер за транспорт и врски Миле Јанакиески во Обвинителството за организиран криминал и корупција каде беше повикан да даде исказ за случувањата од 27 април 2017 година во Собранието.
Јанакиески на распитот побарал увид во доказите кои ги поседува обвинителството за крвавиот четврток.
Покрај ексминистерот за транспорт и врски, неделава на распит беа повикани и поранешниот претседател на Собранието, Трајко Вељаноски, и ексминистерот Спиро Ристовски.Обвинителството за организиран криминал и корупција на почетокот на годинава отвори истрага против пет лица кои се сомничат дека се организатори на упадот.

Освен Јанакиески, како организатори се осомничени и експремиерот Никола Груевски, ексминистерот за труд и социјална политика Спиро Ристовки и Никола Бошкоски, поранешен вработен во УБК кој е во бегство.
Во претходната постапка за крвавиот четврток, Јанакиески, Вељаноски и Ристовски, од страна на сега осудениот Александар Василевски Нинџа беа посочени како организатори на упадот во Собранието. Според сведочењето на Василевски, ексминистрите на 27 април се наоѓале на осмиот кат во зградата на ВМРО-ДПМНЕ од каде го координирале упадот.
Во февруари на Јанaкиески му беше определен куќен притвор поради опасност од бегство и влијание врз истрагата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЗНАМ до СДСМ: Ресетирајте се, излезете од канџите на муртинските коруптивни мрежи
Откако СДСМ, како по обичај, се обиде да ја замени реалноста со партиска илузија, чувствуваме обврска да ги потсетиме на неколку непобитни факти. Додека тие зборуваат за „најсилна опозициска партија“, граѓаните во првиот круг од локалните избори зборуваа преку бројки – а бројките за нив се запрепастувачки, истакнуваат од Движењето ЗНАМ – За наша Македонија.
СДСМ, под актуелното раководство, коценуваат од таму, го доживеа најголемиот изборен пораз во својата историја.
„Нивните кандидати за градоначалници беа избришани уште во првиот круг во повеќе општини, и тоа во Куманово, нивниот „чесен и докажан“ кандидат Мартин Костовски, не успеа ни да влезе во вториот круг, и заврши на срамно четврто место. Додека пак нивниот кандидат за градоначалник во Центар, Горан Герасимовски, ќе биде убедливо поразен во вториот круг.
Толку за нивните „планови“, „сила“ и „рејтинг“.
Имено, ја разбираме потребата на ова раководство на СДСМ да се обиде политички да преживее дури и по ваков дебакл на локалните избори.
Но она што се случи, е доказ дека СДСМ повеќе не е партија, најмалку “најсилна опозициска партија”, туку распаѓачки остаток од некогашен систем што живее само на инерција и старо име.
Партијата што некогаш се темелеше на вредности и идеали, денес е претворена во приватен клуб на интереси, бизниси и меѓусебни војни за остатокот од влијание“.
СДСМ, додаваат од ЗНАМ, е политички труп што глуми живот додека се гуши под тежината на сопствениот криминал и лаги, без визија, без морал.
„СДСМ не изгуби поради ВМРО, ниту поради ЗНАМ – изгуби поради себе, поради ароганцијата, криминалот и отуѓеноста од народот. Изгуби затоа што одамна ги заменија идеологијата и вредностите со лични интереси.
Движењето ЗНАМ не е ничиј тројански коњ, ниту придружна партија во туѓи игри. ЗНАМ расте, и тоа благодарение на граѓаните што веруваат дека чесноста, принципите и работа во нивен интерес сè уште имаат смисла. На овие локални избори ја потврдивме стабилизацијата на нашето гласачко тело и покажавме дека политиките што ги водиме се во вистинска насока.
Нашиот концепт на народна и чесна политика добива сè поголема поддршка низ целата држава – и тоа беше првата јасна порака од првиот круг на овие избори. За првпат, Движењето ЗНАМ освои советнички места во повеќе од 50 општини, како и во Градот Скопје“.
Тоа е доказ, нагласуваат, дека ЗНАМ станува релевантна политичка сила што го менува системот одвнатре, со работа, резултати и чесен пристап.
На СДСМ им порачуваат – „Ресетирајте се и излезете од канџите на муртинските коруптивни мрежи кои ве држат заробени! Ослободете се од продолжената рака на Заев, Венко Филипче и криминалците што ја претворија партијата во приватна фирма и политички сервис на неколкумина. Го изгубивте целосно достоинството, ја изгубивте довербата и контактот со народот“.
Македонија
М-НАВ: Тасевски призна дека штрајкот што го најави беше незаконит и свесно спроведува атака
На 22.10.2025 година М-НАВ АД Скопје преку правниот застапник адвокат Горан Николовски одржа прес-конференција, на која беа презентирани ставовите и аргументите на М-НАВ АД во врска со штрајкот најавен од страна на ССКЛ – подружница на Независниот синдикат за сообраќај и врски за 20.10.2025 година и забранет како незаконит од страна на Основниот граѓански суд Скопје, истакнуваат во денешното соопштение од М-НАВ АД Скопје.
Истиот ден, по завршување на прес-конференцијата на М-НАВ АД, како што потсетуваат, прес-конференција одржа и г. Александар Тасевски, претседател на ССКЛ – подружница на Независниот синдикат за сообраќај и врски.
„На тој прес г. Александар Тасевски изјави дека:
• Барањата за заштита на работнички права од работен однос како причина за организирање на штрајк се доставени уште во 2023 година и директорите да ги побараат преку архивата на М-НАВ;
• Воедно, запрашан од страна на новинарите дали, ако повторно одат на штрајк, во следното известување ќе бидат наведени барањата за заштита од работен однос и ќе биде спроведена постапката за помирување, г. Александар Тасевски изјави дека дека не може да ги наведат барањата за заштита на правата од работниот однос од причина што во тој случај ќе треба да почне нова постапка за помирување.
Во врска со изнесените наводи на г. Александар Тасевски јавно му се заблагодаруваме за неговото признание дека штрајкот најавен од страна на ССКЛ – подружница на Независниот синдикат за сообраќај и врски за 20.10.2025 година и забранет како незаконит од страна на Основниот граѓански суд Скопје, е незаконит и дека г. Александар Тасевски е свесен дека постапува надвор од законот“.
Тасевски, додаваат во соопштеното, јавно призна дека свесно спроведува незаконска атака врз М-НАВ АД Скопје, односно дека свесно ја загрозува и внесува несигурност во секторот авиосообраќај и свесно го руши угледот на М-НАВ АД Скопје и на државата во целост.
Со ваквите признанија, како што оценуваат, уште еднаш се потврдува дека станува збор за лично политикантство и желба за само промоција.
„Исто така, наводите на г. Александар Тасевски дека во законот се предвидува дека кој било синдикат вертикално, дали е тоа синдикат на работодавци, синдикат на гранка или сојузот на синдикати, има право да организира штрајк, се однесуваат исклучиво на Независниот синдикат за сообраќај и врски, а не и на подружницата ССКЛ, со оглед дека подружницата не е синдикат, нема правен субјективитет и евентуалното организирање штрајк како заштита на правата од работниот однос може да ги остварува единствено преку Независниот синдикат, чија подружница е“.
Македонија
Герасимовски: Со директорите на училиштата и градинките договоривме конкретни мерки, дератизација, дезинсекција и дезинфекција на сите училишни објекти
Градоначалникот на Општина Центар, Горан Герасимовски, денес одржа работна средба со директорите на основните училишта и градинките, на која беа договорени конкретни активности за одржување на хигиената во образовните установи на највисоко ниво.
Договорено е во текот на викендот да се спроведе повторна дератизација, откако веќе имаше една пред изборниот процес. Веднаш потоа ќе следат дезинсекција и дезинфекција на сите училишни и предучилишните објекти.
„Ова што денеска го договоривме се реализира согласно усвоените кризни мерки на Општина Центар за справување со потенцијални епидемии, заразни болести и појава на глодари опасни по здравјето, а во рамки на актуелната состојба со сметот“ посочи Герасимовски.
Планот, освен дератизација, предвидува темелна дезинфекција и дезинсекција на сите простории каде се учи и престојува, вклучувајќи подови, ѕидови и мебел. Ќе се користат сертифицирани и безбедни препарати, согласно упатствата и стандардите за заштита на здравјето на децата и вработените.
Активностите за чистење на воспитно-образовните установи се преземаат во рамки на заштита на здравјето и безбедноста на децата и персоналот, особено во услови на еколошки и здравствени предизвици и појава на глодари, информираат од општината.
Герасимовски истакна дека општината ќе продолжи со редовно следење на состојбата и континуирана соработка со директорите, со цел да се обезбедат хигиенски услови во средини каде престојуваат вработените и децата.

