Македонија
Јаневска: Им ги укинувате телефоните на истите деца што Царовска ги советуваше да учат од нив оти нема книги

Претседателката на Комисијата за образование и наука на ВМРО-ДПМНЕ, Весна Јаневска, вели дека владините препораки за училиштата се неразбирливи, несоодветни и нецелосни. Таа смета дека потребни се стручни тимови за поддршка на родители и деца со девијантно однесување, а не разговори со секое дете.
„Читам Владата донела сет препораки за училиштата за подигање на безбедноста и превенција на врсничкото насилство.
Општините во соработка со меѓуопштинските центри за социјална работа треба да формираат стручни тимови, кои ќе разговараат со секое дете во секое училиште. Не баш ја разбирам мерката, ама ако сакате да им го одземете времето и вниманието од оние со кои треба да разговараат и долгорочно да работат, идејата не е лоша. Стручни тимови за поддршка на родители и деца со девијантно однесување требаат, не разговори со секое дете, но вие сте власт, вие одлучувате.
Сите основни и средни училишта да одржат состаноци со сите родители за подобрување на процесите, безбедноста, организацијата и состојбите во училиштата. Ова работа на родителите е? Да, добредојдени се идеи и помош, но ова е работа на МОН. Родителите да се потсетат на Законот за семејството и Кривичниот закон во делот на одговорноста при извршување на родителското право. Ќе ги потсетат и понатаму?“, прашува Јаневска.
Според неа, на родителите чии деца покажуваат врсничко насилство не им треба потсетување, туку им треба стручна помош, инаку, како што вели, детето не би се однесувало така како што се однесува.
„Укинување употреба на мобилни телефони на час. Ова е баш ‘најдобрата мерка’ небаре баш сите деца на час играат видеоигри или гледаат во телефон за забава. Заборавивте дека Мила Царовска им велеше од телефон да учат? Знаете дека недостига ИКТ-опрема, па децата користат телефон наместо таблет? Знаете дека нема, на пример, учебник по француски, па децата користат телефон? Дома ќе им ги забраните?“, додава Јаневска.
Не треба забрана за телефон, вели Јаневска, туку треба воспитување, разликување на добро и лошо, емпатија.
„Чисто за информација, во Словенија постои катедра за невронаука во образование и воспитание“, заклучи Јаневска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Oблачно време со повремени врнежи, температура до 19 степени

Времето денес ќе биде променливо облачно со повремени локални врнежи од дожд. Ќе дува слаб до умерен ветер од југоисточен правец. Минималната температура ќе биде во интервал од 6 до 13, а максималната ќе достигне од 14 до 19 степени.
Во Скопје, променливо облачно со услови за повремен слаб дожд. Ќе дува слаб до умерен јужен ветер. Минималната температура ќе се спушти до 10, а максималната ќе достигне до 19 степени, јавува УХМР.
Во наредните денови следува период на променливо облачно време со повремени локални врнежи од дожд, освен во четврток и сабота кога ќе преовладува стабилно време. Во петок и сабота ќе дува засилен ветер од југозападен, а од недела од јужен правец.
Македонија
Повеќе делови од Скопје денес без струја

ЕВН Македонија АД извести дека денес без електрична енергија ќе бидат:
– во периодот од 08.00 до 14.00 часот, дел од корисниците од село Долно Лисиче. (Општина Аеродром)
– во периодот од 8:30 до 14:30 часот, корисниците од ул. 4 и ул. 10 во Сарај. (општина Сарај)
– во периодот од 08:30 до 16:00 часот, корисниците во подрачјата Мала Река, Алдинци, Караџица и Солунска Глава. (општина Студеничани)
– во периодот од 9:00 до 12:00 часот, корисниците од бул. Борис Трајковски лоцирани од раскрсницата со патека за Лисича кон Охис, ул. 1523, кон Драчево од бр. 77 до бр. 85, како и корисници лоцирани помеѓу објектите кај Циле Инженеринг и Интеграф. (општина Кисела Вода)
– во периодот од 9:00 до 13:00 часот, корисници од ул. Питу Гули лоцирана во близина на српската амбасада. (општина Центар)
– во периодот од 9:00 до 14:30 часот, дел од корисниците од ул. Пијанец. (општина Карпош)
– во периодот од 9:00 до 15:00 часот, корисници на блокот на зградата лоциран на потегот од Бул. Партизански одред бр. 17 Кон ул. Максим Горки. (општина Центар)
Македонија
Митески: Наместо Градот, ние го собираме отпадот во Аеродром

Кандидатот за градоначалник на општина Аеродром, Дејан Митески, изјави дека општината самоиницијативно се справува со зголемените количества отпад, иако надлежноста за комуналната чистота е на Град Скопје.
„Сликата е жалосна во цело Скопје, но ние во Аеродром не чекаме – дневно депонираме повеќе од 10 тони отпад во Дрисла,“ изјави Митески.
Тој нагласи дека, пред да се воведат казни, неопходно е граѓаните да имаат услови каде да го одлагаат отпадот.
„За првпат како општина воведовме редовни акции коишто траат два месеци на пролет и на есен за одлагање на кабаст отпад, понудивме услуга преку нашето јавно претпријатие да може на повик, граѓаните дојдат и го депонираат отпадот за симболичен надоместок, за првпат лиценциравме јавно комунално претпријатие коешто може да одвезува и да транспортира неопасен отпад“, рече Митески.
Во гостување на Телма, тој додаде дека Аеродром веќе има лиценцирано јавно комунално претпријатие што може да одвезува и транспортира неопасен отпад.
Покрај тоа, Митески најави и дел од инфраструктурните и еколошките проекти од програмата – топлификација на Лисиче, нов културен дом и зелена офанзива со засадување нови садници во соработка со инвеститорите.