Македонија
Јаневска на почетокот на новата академска година: На државата ѝ е потребна поддршка од сите фактори, особено од младите

„Од денес имаме нова генерација студенти. Им посакувам добредојде во академскиот свет. Внимателност и активно учество во предавањата, ќе им помогнат за полесно совладување на материјата. Љубопитноста ги проширува видиците и овозможува надминување на резултатите од учењето, кои се наведени во студиските програми. Креативноста, иновативноста и желбата за натпревар, пак, создаваат лидери на позитивни промени, лидери на бизниси и на општествени процеси и токму такви нам ни се потребни“, рече министерката за образование и наука на првиот академски час во новата академска 2024 – 2025 година на Универзитетот „Гоце Делчев“ во Штип.
Посочи дека на државата ѝ е потребна поддршка од сите фактори, особено од младите, за, како што рече, да го забрзаме напредокот.
„Без млади, не само што нема добра, туку, нема никаква иднина. И затоа ми е драго за сите вас, што сте одлучиле да студирате и искрено очекувам да го реализирате својот потенцијал токму тука. Тој потенцијал ќе го надградувате заедно со професорите. Ним сте им препуштени, верувајте им и слушајте го секој еден совет кој го даваат“, додаде Јаневска, потенцирајќи дека УГД е реномиран универзитет каде работите не се препуштени да течат сами по себе, туку се носат храбри одлуки, се иновира и се инвестира во условите и во човечкиот капитал.
Министерството за образование и наука и Владата ќе го наградат вложениот труд на сите чинители на високообразовниот процес. Јаневска информираше дека за професорите следува значително повисока плата од следната календарска година. За студентите продолжува поддршката преку повеќе категории на стипендии, но и зголемен износ на субвенционираниот студентски оброк од јануари 2025 година, достапност на литература и на мрежи и програми за интернационална размена на знаења и искуства. Студентските домови етапно се реновираат и очекувањата се дека за 4 години отсега сите ќе станат современи и енергетски ефикасни.
„Нема да ветам нов студентски дом тука во Штип, но ќе споделам дека со раководството на Универзитетот и со локалната самоуправа дискутираме за изнаоѓање решение за да има доволно и пристојни сместувачки капацитети“, информира Јаневска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
Тошковски – Поклукар: Одлична соработка на полето на безбедноста, Словенија ја дава својата поддршка во секој чекор

Денеска во Охрид, министерот за внатрешни работи Панче Тошковски, оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредувањето на меѓусебната соработка и продлабочување на одличните пријателските врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници. Македонската делегација на средбата предложи потпишување на Меморандум за разбирање помеѓу Центарот за обука на МВР и словенечката полициска академија за зајакнување на соработката во областа на образованието и заедничките обуки на кадетите и полициските службеници од двете полиции.
Тошковски се заблагодари на министерот Поклукар за целата поддршка што Словенија и словенечкото министерство за внатрешни работи постојано ни ја даваат како министерство и држава, како во справување со пожарите минатата и оваа година така и целата поддршка што ни ја дадоа во справување со последиците од трагедијата која се случи во Кочани оваа година.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција“, образложи Тошковски.
ТПотенцираше дека преку министерот Поклукар, пријателската Словенија уште еднаш ја потврдува својата поддршка како еден од нашите најголеми поддржувачи во процесот на евроинтеграции, со тоа што се вложи со целиот негов тим да бидат на располагање на македонските полициски службеници и МВР во однос на исполнување на сите услови и критериуми зададени од Европската унија.
Словенечкиот министер за внатрешни работи Боштјан Поклукар го потенцираше пријателството и соработката што меѓу нашите народи и држави се пренесува и на министерствата за внатрешни работи и потенцираше дека и во иднина можеме да сметаме на нивната целосна поддршка како во искуство и знаење така и на конкретни проекти и ситуации со цел да придонесуваме кон поголема безбезбедност на регионот, нашите држави и нашите народи.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, потенцираше словенечкиот министер Поклукар.
Поклукар истакна дека Словенија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат кој на крај носи огромни бенефити за граѓаните и функционирањето на институциите и изрази надеж дека заслуженото место на Македонија во ЕУ ќе дојде што поскоро.