Македонија
Јовев одговори на понудата од министерот кој го разреши, јавноста не стивнува со реакции
По разрешувањето на директорот на Клиниката за кардиохирургија, Сашко Јовев, јавноста не стивнува со коментари и изразување на поддршка на социјалните мрежи.
Истакнати личности од општествениот живот во државата реагираат и со негодување гледаат на чинот на министерот за здравство Фатмир Меџити, кој вчера реши да го разреши Јовев, а денеска му понуди да му биде национален советник за кардиохирургија.
„Да го разрешиш кардиохирургот Јовев, човекот што го предводеше тимот за прва трансплантација на срце во земјава, заради банална причина е навреда за здравиот разум. Затоа мислам дека за сите нас како граѓани најдобро е ваквата одлука веднаш да се поништи“, напиша на социјалните мрежи истакнатиот економист, Зоран Јовановски.
Професорот Нико Беќаровски во објава на својот статус дополнува дека „Организационите директори на Клиниките беа “измислени” во септември 2007 година, од тогашниот Министер Имер Селмани и тогашниот Премиер Никола Груевски, за наводно да ги водат сите технички работи по Клиниките и со својот врзан потпис да спречат било какви финансиски малверзации на стручните директори, а во пракса се сведе на вдомување на репрезентативните партиски лепачи на плакати“, пишува тој.
„Пропустите на УК Кардиохирургија, барем тие кои јавно ги слушнавме се исклучиво организациони и финансиски и повеќе од нормално е прво да биде разрешен Организациониот директор, а дури потоа Стручниот директор проф. д-р. Сашко Јовев.
Затоа уште еден апел, веднаш интегрирајте го клинички центар во еден правен субјект, поставете два директори (стручен и финансиски) за цел КЦ по избор на Владата, а на сите 32 организациони единици (Клиники и Институти) дозволете им сами да одберат Стручни Раководители од редот на професорскиот кадар кој го имаат, а за прием на нов персонал да одлучува исклучиво Стручниот колегиум на секоја Клиника.
Само така КЦ може да има стручно-научен прогрес, пациентите врвна здравствена заштита. Се друго е импровизација“, појаснува во напишаното професорот.
„На секое раководно место мора да биде поставен поглуп, понеспособен и понепрофесионален кадар од министерот.
Ова станува се потешка задача затоа што за министри доаѓаат најглупите, најнеспособните и најнепрофесионалните кадри кои може да се ископаат од тињата во државата.
Недостатокот ќе биде надоместен со кадри кои доаѓаат од свежо отворените факултети за штањцање дипломи“, реагира Мирјана Најчевска.
И доктор Ненад Лазаров со став: „Не се брани неодбранливо, очигледно е дека се работи за еготрип.
Министер, најдобронамерно, повлечи ја одлуката со време и смали штета, не си у право, људски е да згрешиш уште повеќе е људски да се поправиш“, напиша тој на социјалните мрежи.
Јовев, кој вчера беше разрешен од позицијата директор на Универзитетската клиника за државна кардиохирургија, истакна дека министерот нему лично не му се обратил во врска со денешната понуда, но потенцира дека, себе си се гледа во Клиниката, заедно со неговиот тим, со кој ќе постигнуваат уште поголеми успеси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја делови од Гази Баба и Ѓорче Петров
Од ЕВН Македонија АД известуваат дека денеска без електрична енергија ќе останат:
· во периодот од 08.00 до 14.30 часот, корисниците на обејкт на Меркур Македонија. (општина Гази Баба)
· во периодот од 09.00 до 14.30 часот, корисниците на дел од улицата Радушка (општина Ѓорче Петров)
Македонија
Променливо облачно со повремени локални врнежи од дожд
Променливо облачно со повремени локални врнежи од дожд. Ќе дува умерен, а долж Повардарието повремено засилен ветер од северозападен правец. Минималната температура ќе биде во интервал од 3 до 6, а максималната ќе достигне од 10 до 17 степени.
Во Скопје, променливо облачно, претпладне со повремени локални врнежи од дожд. Ќе дува умерен ветер претежно од северен правец. Минималната температура ќе се спушти до 6, а максималната ќе достигне до 16 степени.
Времето во наредните денови
Под влијание на стабилна воздушна маса следува период на суво и стабилно време. Утринската температура ќе се спушти под нулата, а во одредени котлини ќе има услови за појава на магла.
Македонија
Центар наскоро ќе стане првата општина во земјава со систем за мерење на бучава, рече Герасимовски
Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.
„Заврши јавната набавка, чекаме да поминат изборите за да ги поставиме мерните единици – првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација“, изјави Герасимовски.
Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.
Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.
„Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок“, рече Герасимовски.
Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.
„Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични“, додаде градоначалникот.

