Македонија
Јубилејни 20 синдикални игри на Македонскиот полициски синдикат
Министерот Оливер Спасовски денес во присуство на претседателот на Македонскиот полициски синдикат, Марјан Кицев, претставници на синдикатот и министерството и гости од странство ги отвори јубилејните 20 по ред синдикални игри на македонскиот полициски синдикат.
Спасовски во своето обраќање потенцираше дека традицијата на одржување на спортскиот дух, на здравата компетиција, запознавањето и другарувањето, се вредности коишто и тоа како се важни, особено кога се работи за професија како полициската, професија што има посебен и мошне висок степен на одговорност кој пак произлегува од специфичноста на законските и други надлежности.
„ Верувам дека овој синдикален настан, односно овие сега веќе јубилејни 20-ти по ред синдикални игри и средби што традиционални ги организира Македонскиот полициски синдикат ги демонстрираат токму таквите вредности претставувајќи извонредна прилика за дополнително професионално зближување и запознавање на луѓето, како и можност за бројни размени на искуства, што секако можат да бидат само од полза на синдикално организирање и професионално работење.“, потенцираше министерот Спасовски.
Министерот се осврна и на фактот дека министерството и синдикатот негуваат партнерство и соработка на стратешко ниво под мотото: опремена полиција – задоволни граѓани и истакна дел од инвестициите, реформите и унапредувањата направени во овој период.
„ Резултатите, меѓу другото се видливи во сите 76 реконструирани објекти на МВР ширум државата, во кои имплементиравме и мерки за енергетска ефикасност. Покрај ова, инвестиравме над 10 милиони евра во нови униформи за секоја организациона единица и секогаш во дијалог со вработените одговараме на нивните потреби. Редовно се исплатуваат бонус платите, три пати е зголемена плати за вработените, во 2018, 2019 и годинава 2022. Започнувајќи од овој месец имаме зголемување на платата за 5% за сите вработени. Успеваме во нашата цел денес да имаме мотивирани колеги, задоволни и горди што се дел од институцијата каква што е Министерството за внатрешни работи.“, потенцираше министерот Спасовски.
На крај Спасовски ги прогласи игрите за отворени посакувајќи им успех и добри резултати на сите учесници на спортските игри, со увереност дека оваа убава традиција и натаму во иднина ќе добива уште повеќе на квалитет, бројност и меѓународен карактер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Стоилковски го поздрави лидерот на ДУИ јадејќи бисквита: „Поздрав, Али“
Портпаролот на ВМРО-ДПМНЕ, Наум Стоилковски, на социјалните мрежи објави видео во кое, јадејќи бисквита го поздрави лидерот на ДУИ, Али Ахмети.
Стоилковски вели дека оди на состанок со коалициските партнери на ВМРО-ДПМНЕ, а потоа зема бисквита и почнува да ја јаде.
„Поздрав, Али“ , вели Стоилковски.
Стоилковски алудира на изјавата на Ахмети која тој ја даде од митингот на „Европскиот фронт“ во Скопје пред одржувањето на првиот круг од претседателските избори кога рече оти лидерот на ВМРО-ДПМНЕ е израснат со бисквити и гурабии.
Македонија
ЕУ: Очекуваме соработка со претседателката на Македонија, парламентот и владата за да работиме на европскиот пат
Европската унија и честита на Гордана Силјановска Давкова за нејзината победа на претседателските избори во Македонија и со нетрпение очекува да работи со првата жена лидер во земјата, изјавија високиот претставник на ЕУ за надворешни работи и безбедност Жозеп Борел и европскиот комесар за проширување и соседска политика Оливер Вархељи
Борел и Вархеи, во заедничката изјава објавена по повод вториот круг од претседателските и редовните парламентарни избори во Северна Македонија, ги охрабрија „релевантните политички актери да работат на формирање парламент и стабилна влада“.
„Двете институции треба да работат заедно на подобрување на европскиот пат на Северна Македонија, кој вклучува имплементација на клучните реформи, особено во областа на владеењето на правото и борбата против корупцијата, во интерес на сите нејзини граѓани“, се вели во заедничката изјава на Борел и Вархеи.
Македонија
Боки-13 за операцијата „Бумеранг“: поднесе кривични против Заев, Спасовски, Русковска
Бојан Јовановски-Боки 13 поднел кривични пријави против поранешниот премиер Зоран Заев, ексминистерот за внатрешни, Оливер Спасовски, и двајцата генерални секретари на СДСМ, поранешниот Александар Кирацовски и актуелниот Миле Зачевиќ, како и против поранешната шефица на Јавното обвинителство за гонење организиран криминал и корупција, Вилма Русковска.
Тој дошол во Обвинителството на покана на актуелниот шеф на оваа институција, Ислам Абази.
Најави дела кривично-правната операција е наречена „Бумеранг“.
„Сите мои наводи и описот на настаните ќе бидат материјализирани со докази што потекнуваат од мојот телефонски уред, кој ми беше одземен при моето апсење во предметот ‘Рекет’. Се работи за кривични дела што се однесуваат на злоупотреба на службената положба и овластувањето, за изборни измани, незаконско финансирање политичка партија, злоупотреба на јавните набавки“, додаде тој.
Најави и продолжение на предавање докази во писмена форма.
„Поднесена е кривична пријава и против Вилма Русковска за злоупотреба на службената положба, примање поткуп, примена на тортура. Зоран Заев е речиси во секоја пријава“, рече Јовановски.