Македонија
Љутков: Еногастрономската индустрија можност за развој на туризмот
Министерот за култура и туризам, Зоран Љутков, денеска во Музејот на македонската борба се обрати на научно-стручниот собир „Еногастрономски туризам: Како да креираме автентични македонски туристички искуства?“, во организација на Факултетот за туризам и бизнис логистика при Универзитетот „Гоце Делчев“ – Штип.
Во своето обраќање, Љутков истакна дека гастрономијата и винската индустрија претставуваат едни од најважните културни и економски сектори на нашата земја, кои со своето богатство и разновидност нудат задоволство на вкусот, но и многубројни можности за развој на туризмот и за промоција на нашиот уникатен идентитет.
„Македонија е земја со длабока историја, богата култура и природни убавини кои оставаат без здив. Но, нејзиниот вистински дух се доживува преку еногастрономијата – преку вкусот на традиционалните јадења и ароматите на врвните вина што раскажуваат приказни за плодната почва, сончевите лозја и вековните обичаи“, рече министерот.
Тој посочи дека земјава ги има сите предиспозиции за да биде препознатлива на глобалната еногастрономска сцена. Затоа, како што рече, ако сакаме да ја позиционираме Македонија како врвна туристичка дестинација, ние, едноставно, мора да ја истакнеме нејзината еногастрономска аура – како нејзин белег, како нејзина предност, како нејзина порака до светот.
„Гастрономијата и винската индустрија во Македонија имаат голем потенцијал за понатамошен развој. Со правилна поддршка и инвестирање во инфраструктурата, образованието и маркетингот, Македонија може да стане регионален лидер во еногастрономската индустрија. Развојот на туризмот заснован врз локалните гастрономски и вински ресурси ќе обезбеди нови работни места и ќе ја зголеми видливоста на Македонија како дестинација за висококвалитетен туризам“, рече Љутков.
За таа цел, според министерот, потребна е интензивна соработка помеѓу јавниот и приватниот сектор, како и понатамошна едукација и промоција на македонската кујна и вино.
„Потребно е сите чинители – од земјоделците и винопроизводителите до рестораните и туристичките агенции – да работат заедно, на создавање брендови кои на најдобар начин ќе говорат за нас на пребирливата, светска, еногастрономска сцена. Само така ќе успееме да го откриеме вистинскиот потенцијал на нашата земја и да се поставиме како важен играч во глобалниот еногастрономски свет“, потенцираше Љутков.
На научно-стручниот собир се обратија и Елена Младеновска Јеленковиќ, извршна директорка на здружението „Вина од Македонија“ и деканката на Факултетот за туризам и бизнис логистика, Татјана Бошков.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Фото) Герасимовски: Фантастична предновогодишна вечер на Боемска, центарци со позитивна енергија влегуваат во 2026
Со предновогодишната забава „Вечер под ѕвездите“, општина Центар симболично ја заокружи 2025 година и посака добредојде на Новата година.
Боемска улица синоќа беше преполна со расположени и весели скопјани кои се препуштија на празничната атмосфера, подготвена специјално за нив.

Уште на самиот почеток, вештите акробати и жонглери во ритамот на диско музиката на ди-џеј Александар Јорданов ги воодушевија посетителите со своите трикови и мајсторски точки, известуваат од Општината

Вечерта кулминираше со настапите на „Brass Brothers“ и „Либеро бенд“, чија енергична изведба на популарните хитови ја разигра публиката, која, и покрај студеното време, остана насмеана и во добро расположение.
На присутните им се обрати и градоначалникот Горан Герасимовски, посакувајќи им здравје, среќа и весели моменти во следната година.

„Ова беше навистина фантастична забава! Ви посакувам и во 2026 година да ве следи оваа иста позитивна енергија која вечерва заедно ја споделивме“, порача Герасимовски.

Вечерта заврши со спектакуларен огномет, кој ја најави магијата на претстојните празници.
Македонија
Декемвриската пензија ќе се исплати навремено, на 2 јануари 2026 година, известува Фондот на ПИОМ
Фондот на ПИОМ ги известува сите корисници на пензија дека целосно се обезбедени потребните средства за исплата на пензиите за месец декември 2025 година.
„Како институција одговорна за исплата на пензиите и обезбедувањето на правата од пензиското и инвалидското осигурување и социјанта сигурност на пензионерите, Фондот навремено ги заврши сите подготовки за непречена реализација на исплатата на пензиите.
За оваа намена се обезбедени средства во вкупен износ од 9.289.521.686,00 денари (девет милијарди 289 милиони 521 илјади 686 денари) за вкупно 340.156 корисници на пензија. Поради тоа што 1-ви јануари е неработен ден (државен празник), средствата ќе бидат префрлени до деловните банки на 2 јануари 2026 година“, соопшти Фондот на ПИОМ.
„Известувањата со прецизните податоци за бројот на пензионери и соодветните износи Фондот на ПИОМ веќе ги достави до сите деловни банки, со што се гарантира дека процесот на исплатата ќе се одвива ефикасно и без доцнење“, се додава во соопштението.
Македонија
Какво ќе биде времето за дочекот на Новата година и 1 јануари
Времето утре ќе биде сончево и студено, со мала до умерена локална облачност. Ќе дува умерен ветер, а долж Повардарието повремено засилен ветер од северен правец.
Во Скопје се очекува претежно сончево и студено време, со умерен северен ветер.

Прогноза за 1 јануари
Минималните температури ќе се движат од -12 до -2 степени, додека максималните ќе бидат од -1 до 7 степени Целзиусови. Времето ќе биде претежно сончево и студено, со слаб до умерен ветер од северозападен правец.

