Македонија
(Видео) Ќе се исфрла мазутот за греење од јавните институции

Доволно е да се отвори веб-страницата на јавни набавки за да се види дека голем број болници се греат на мазут, со што се предизвикува тешко загадување на воздухот. Алармот најсилно се приклучи кога пред неколку дена се појавија снимки од Гинеколошката болница во Чаир, каде што се гледаше како од оџаците излегува црн чад.
Градоначалникот на Скопје, Петре Шилегов, најави дека ако болницата не престане да се грее на мазут во рок од 30 дена, ќе биде затворена, а денеска министерот за здравство, Венко Филипче, најави дека ќе почнат тендерски постапки за болницата во Чаир и болниците во Куманово и Струмица со цел тие да се приклучат на системот за гасификација.
На системот за јавни набавки може да се види дека последнава годинава и Клиничката болница во Битола нарачувала мазут за греење, понатаму Студентскиот дом „Кочо Рацин“ во Битола, Општата болница во Куманово, болницата во Прилеп, Градската болница „8 Септември“, болницата во Гевгелија и многу други јавни установи.
„Бидејќи повеќе јавни установи користат мазут за затоплување, тоа е приоритет во планот за чист воздух. Затоа, веќе идната недела ќе го потпишеме договорот со БЕГ за замена на мазутот во Студентскиот дом ‘Кузман Јосифовски – Питу’ и една градинка во општина Центар и тие се првите установи каде што ќе биде извршена замена. За жал, премногу пари државата троши за мазут и ова не е само еколошка акција, туку и заштеда на буџетот“, рече заменик-министерот за животна средина, Јани Макрадули, на денешната посета на Гинеколошката болница во Чаир.
Министерот за здравство, Венко Филипче, рече дека проектот за гасификација, кој бил изготвен минатата година, влегол во планот за јавни набавки и дека по распишувањето на тендерските постапки, Гинеколошката болница во Чаир, како и болниците во Куманово и Струмица, ќе може да се приклучат кон мрежата за гас и на тој начин да се греат. Филипче не знаеше да даде дециден рок кога ќе се случи ова.
„Може да поминат недели или месеци, како што пропишуваат законите“, рече тој.
На денешната заедничка прес-конференција присутен беше и претставник од компанијата „Блу ер“, кој донира прочистувачи за воздух од 10 илјади евра за здравствениот објект во Чаир.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Пожарот кај хотелот „Њу Стар“ локализиран, ЦУК бара итни мерки за дивата депонија во Визбегово

Пожарот кој избувна во близина на хотелот „Њу Стар“ во скопската населба Визбегово е локализиран, но на терен и понатаму дежураат две екипи на Територијалната противпожарна единица на Град Скопје.
Како што информира Центарот за управување со кризи (ЦУК), во денешната интервенција биле ангажирани вкупно седум противпожарни возила и 20 пожарникари. Пожарот зафатил површина од околу 5000 квадратни метри, при што биле опожарени жито, еден магацин со градежни материјали, како и дворот на хотелот.
„Денеска, при повторно разгорување, пожарот се прошири до хотелот „Њу Стар“, како и до околните куќи, со што директно беа загрозени животите на граѓаните“, стои во објавата на ЦУК на Фејсбук.
Оттаму апелираат до сите надлежни институции и локалните самоуправи итно да се вклучат со конкретни чекори и да се стави крај на проблемот со дивите депонии, кои, според нив, претставуваат сериозна опасност по животната средина и јавното здравје.
ЦУК информира дека директорот Мухамед Али денеска испратил ново барање до надлежните институции со цел итно преземање активности за конечно решавање на овој проблем.
„Проблемот со оваа дива депонија трае подолг временски период и претставува реална закана за здравјето, безбедноста и добробитта на граѓаните, како и сериозна оперативна оптовареност за БППЗ, која често е ангажирана на истата локација“, посочуваат од ЦУК.
Оттаму потсетуваат дека во текот на изминатата недела директорот Али повеќекратно испратил официјални барања за интервенција, но засега нема конкретен одговор од надлежните.
Македонија
Мицкоски ја доби тужбата против Славјанка Петровска за клевета

Граѓанскиот суд во Скопје донел правосилна пресуда во корист на премиерот Христијан Мицкоски, утврдувајќи дека пратеничката од СДСМ и поранешна министерка за одбрана, Славјанка Петровска, јавно ширела невистини и клевети против него.
Како што информира премиерот преку објава на социјалните мрежи, судот ѝ наложил на Петровска не само да се извини, туку и да ја објави пресудата во медиумите.
„Ова е уште една потврда дека на лагата ѝ се кратки нозете. Судот потврди дека поранешната министерка и актуелна пратеничка ширела лаги и клевети против мене. Вистината мора да излезе на виделина“, напиша Мицкоски.
Тој ја искористи приликава и за поширока критика на политичката култура на неговите опоненти.
„Очигледно, лажењето како синдром на политичката култура на СДСМ не престанува да биде нивен заштитен знак. Со оваа пресуда се потврдува не само дека лажат, туку и дека не се промениле. Продолжуваат да го потценуваат народот“, порача премиерот.
Според Мицкоски, оваа судска победа не е лична, туку борба за вистината и достоинството на секој човек кој се спротивставува на политичките манипулации.
„Ова не е моја лична битка, ова е битка за принципи, за вистината, за достоинството на секој поединец кој не дозволува неказнето да му се лепат лаги“, стои во неговата објава.
Тој додава дека продолжува да работи со посветеност и дека „лагите ќе паднат, а вистината победува“.
Скопје
Град Скопје: Обвинителството го отвори првиот случај за дивоградбите во Чаир

Основното јавно обвинителство ја започна постапката по првата пријава за фалсификати поврзани со градби во Општина Чаир, информираа денеска од Град Скопје.
Според соопштението од прес-службата, истрагата се однесува на сомневања за фалсификување на документи и незаконска легализација, а се поврзува со поранешниот градоначалник на општината, Висар Ганиу.
„Основното јавно обвинителство ја започна постапката по првата пријава со фалсификатите. Таму веќе се водат уште две постапки претходно започнати за Висар Ганиу, првата за фалсификување на целата архивска книга со броеви и барања за легализации, а втората за уште еден случај каде што незаконски се легализирале објекти со соучесник“, стои во соопштението.
Од Град Скопје испратија и повик до Основното јавно обвинителство за гонење на организиран криминал и корупција, со барање конечно да започне постапка против, како што велат, „организираната криминална банда“ во Чаир.
„Очекуваме и Основното јавно обвинителство за гонење на организиран криминал и корупција да се одважи и да почне да постапува против организираната криминална банда во општина Чаир, која овозможувала градење незаконски на небезбедни згради со црни пари од нелегални извори“, велат од Град Скопје.
Во реакцијата се посочува и дека некои од лицата кои се појавуваат како сопственици на овие објекти сега се милионери, а официјално се прикажани како градители на зградите уште од пред 5, 6, 10, па и 11 години.