Македонија
Бадијала толкава борба за албанскиот, Адеми од ДУИ си зборуваше на македонски

Пратеникот на ДУИ, Џеват Адеми, заборави на борбата што пред еден месец се водеше во Собранието за официјализацијата на албанскиот јазик и на јавната расправа за формирањето на Агенцијата за национална безбедност тој се обрати на македонски јазик. Адеми ги изненади присутните, кои не разбираат албански и со слушалки чекаа симултан превод. За волја на вистината, излагањето на Адеми беше кусо, но тој овој пат реши да не го искористи правото да зборува на албански.
„Ние не само како Комисија и како Собрание имаме можност и во други пригоди да ги наметнеме нашите согледувања во однос на новото законско решение. Сметам дека треба да им дадеме повеќе простор на присутните професионалци од областа на безбедноста, да се искажат, затоа што тие ја немаат можноста што ние ја имаме“, рече Адеми од собраниската говорница.
Инаку, ова не е прв случај пратеници на ДУИ да зборуваат на македонски јазик во Собранието. Претходно, исто како и Адеми, неговиот колега Артан Груби на пленарна седница зборуваше на македонски јазик образложувајќи ја потребата од формирање на новото министерство за политички систем и односи меѓу заедниците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Венко Филипче ти имаш фирми во Бугарија, на адреса со Заев каде се свртеа 9 милиони од јагленот од РЕК

„Вечерва Венко Филипче, пред 30-тина луѓе во мала сала во Кисела Вода, потрошил голем дел од својот говор за да ме навредува. Редно е да одговорам“, напиша на социјалните мрежи Бране Петрушевски од ВМРО-ДПМНЕ.
„Венко, најмалку ти имаш право кој било да го обвинуваш за „лажење“ и „бугаризација“. Јас немам бугарски пасош, немам фирми во Бугарија и немам тајни зделки зад грбот на народот. Ајде еднаш биди искрен и признај дека токму ти си синоним за милионски шеми со фирми во Петрич, заедно со браќата!
Не мора на мене, туку на јавноста дај и одговори: Каде завршија 9 милиони евра од јагленот за РЕК Битола? Зошто на иста адреса во Петрич се појавуваат фирми на твоето семејство и на Вице Заев? Дали тие пари завршуваа во ваши фотоволтаични централи, додека народот го оставивте да плаќа скапа струја? Дали преку бугарски фирми финансирате бизниси по светот, додека Македонија ја потонавте во сиромаштија?
Ова се вистинските прашања, Венко.
Не лажи дека јас или Христијан Мицкоски имаме такви врски. Ние немаме ниту бугарски пасоши, ниту скриени фирми. Ние имаме чесна и чиста биографија.
ВМРО-ДПМНЕ и Мицкоски се јасно определени за Македонија во ЕУ, но како достоинствена држава, без понижувања и без тргување со националните интереси.
Доста е од лицемерието Венко! На народот му е јасно дека додека си трупавте милиони преку Бугарија, граѓаните останаа со празни џебови“, вели Петрушевски.
Македонија
Забрана за тешки товарни возила на неколку патни правци

Од 19:45 часот на магистралниот пат Маврово – Дебар воведена е забрана за тешки товарни возила поради задржување на снег на коловоз, извести АМСМ.
Од 19.55 часот воведена е забрана за тешки товарни возила и за патниот правец Гостивар – Стража, додаваат од АМСМ.
Македонија
Посебен сообраќаен режим утре во Скопје

Од утре петок до сабота, во официјална посета на Р.С.Македонија ќе присуствува претседателот на Владата на Република Србија, Ѓуро Мацут.
Од тие причини Едницата за безбедност на патниот сообраќај ќе преземе мерки за посебен режим на сообраќај на подрачјето на град Скопје.
МВР апелира до граѓаните да се почитуваат наредбите што ќе ги даваат униформираните полициски службеници.