Претседателот на Собранието, Талат Џафери, оствари проштална средба со амбасадорката на Кралството Шведска во Република Северна Македонија, Кристин Форсгрен Бенгтсон. Тој изрази благодарност за работата на Амбасадата на Кралството Шведска, која и во текот на мандатот на амбасадорката Форсгрен Бенгтсон продолжи да ги поттикнува и значајно да придонесува за развој и унапредување на односите меѓу двете држави и да дава силна поддршка на евроинтеграцијата на Република Северна Македонија.

Џафери се осврна и на улогата на Амбасадата во посредувањето при реализацијата на иницијативата на шведскиот Риксдаг на соработката за демократски развој со Собранието на Република Северна Македонија нагласувајќи дека запознавањето со добрите практики од шведското долгогодишно парламентарно искуство и за пратениците беше многу значајно за што сведочи нивниот голем интерес и активното учество.

Тој ја искористи пригодата да упати честитка за потпишувањето на пристапните протоколи и почетокот на процесот на ратификација на членството на Шведска во Северноатлантскиот сојуз и изрази уверување дека во време кога континентот се соочува со голема безбедносна криза, членството на Шведска ќе даде значаен придонес кон заедничката безбедност. Воедно, изразувајќи очекување ратификацијата на протоколите бргу да се најде и пред пратениците, упати покана до спикерот на Риксдагот, доколку биде во можност, да присуствува на тој свечен чин во нашето Собрание.

Амбасадорката Форсгрен-Бенгтсон изрази задоволство што во текот на нејзиниот тригодишен мандат земјата ја исполнила едната од своите стратешки цели – членството во НАТО, а сега е на прагот да ја исполни и втората цел, членството во Европската Унија. Осврнувајќи се на билатералните односи, нагласи дека тие бележат нагорен тренд со посетите на највисоко ниво меѓу двете држави, а како исклучително значајна за билатералната парламентарна соработка ја оцени соработката за демократски развој забележувајќи дека темите, а не политичката припадност, ги зближува пратениците од двата законодавни дома во текот на меѓусебните студиски посети. Таа нагласи дека силната и стабилна поддршка на Шведска на европската интеграција на Република Северна Македонија ќе продолжи и во следниот период, особено преку Стратегијата 2021- 2027. Нотирајќи дека истовремено кога Северна Македонија чука на вратата на ЕУ, Шведска чука на вратата на НАТО и изрази надеж дека ратификацијата на протоколот за членство на Шведска во НАТО ќе се случи набргу.

Претседателот Џафери ѝ врачи на амбасадорката признание за нејзиниот придонес и ѝ посака успех во исполнувањето на нејзините нови должности.