Македонија
Џафери – ЗНМ и меѓународни новинарски организации : „Треба да го продолжиме напредокот во медиумските слободи“

Претседателот на Собранието на Република Северна Македонија, Талат Џафери, денеска оствари средба со претставници на Здружението на новинарите на Македонија и на неколку меѓународни новинарски организации.
На средбата се дискутира за напредокот на земјата во однос на слободата на медиумите, за активностите што се преземаат во Собранието во насока на дополнително подигање на нивото на транспарентност и отчетност и за законите и процедурите што се однесуваат на новинарите и медиумите, како и за вклученоста на новинарските здруженија во нивното донесување.
Џафери во неговиот збор потенцира дека веднаш се огласил на барањето за средба, со оглед на неговите континуирани заложби за целосна отвореност на Собранието кон јавноста и за постојана комуникација со новинарите преку доследно почитување на слободата на говорот и мислата и на независноста на медиумите. Притоа тој нагласи дека ги перципира новинарите како партнери во развојот на демократските процеси во земјата за што е неопходно јакнење на транспарентноста на највисоките државни институции и постојан дијалог меѓу новинарите и носителите на државни функции. Во таа насока претседателот на Собранието говореше за практиката воведена од негова страна за одржување редовни месечни брифинзи со собраниските известувачи, на кои информира за завршените, тековните и за планираните обврски и активности во законодавниот дом. Тој исто така посочи дека во интерес на јавноста и граѓаните сите јавни информации што се однесуваат на работата на законодавниот дом редовно се објавуваат и ажурираат на веб-страницата на Собранието.
На средбата, беше поздравено донесувањето на измените на Кривичниот законик со цел поголема безбедност и сигурност на медиумските работници како регулатива што беше подготвена во соработка со ЗНМ, а која овозможува евентуалните напади врз новинари да се третираат како напад врз службено лице. Се разговараше и за можностите за формирање фонд за поддршка на медиумите како еден од механизмите што би обезбедил поголем плурализам во медиумската сфера. Особено беше истакнат фактот дека Северна Македонија напредува во однос на слободата на медиумите, така што се искачила на 38. место според индексот на „Репортери без граници“, за што Џафери посочи дека во иднина треба да се вложат напори тој напредок да продолжи и понатаму да се унапредува.
Овој состанок е во рамките на мисијата Fact Finding на Здружението на новинарите на Македонија, чија цел е подобро разбирање на медиумската ситуација во земјата, со експертизата на претставници на кредибилни меѓународни организации, кои изминативе неколку дена остваруваат средби со клучните институции во земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски по повод Денот на македонската дипломатија: „Таа е мост помеѓу народите и чувар на мирот“

По повод 29 април – Денот на македонската дипломатија, министерот за надворешни работи и надворешна трговија, Тимчо Муцунски, упати честитка преку социјалните мрежи.
Во објавата, министерот потсети дека македонската дипломатија своите почетоци ги има во Бирото за односи со странство, формирано во 1969 година, како прв институционален облик за водење на надворешната политика.
„Овој ден е посветен на дипломатите и сите вработени во Министерството за надворешни работи, чиишто посветеност, професионализам и дипломатска умешност се клучни за градење на меѓународниот углед на нашата земја, за унапредување на билатералните и мултилатералните односи и за одржување на врските со македонската дијаспора“, напиша министерот Муцунски.
Тој додаде дека Денот на македонската дипломатија нè потсетува на важноста на дипломатската мисија како мост меѓу народите, чувар на мирот и промотор на соработката, упатувајќи честитка до сите актуелни и поранешни дипломати и вработени во Министерството за нивниот придонес.
Македонија
Стојаноски: Интерпелацијата за Тошковски e доказ за глодарство и злоба

Интерпелацијата e доказ за глодарство, злоба и бескруполозност на политички актери кои што немаат никаков друг интерес, освен политичко профитерство, изјави пратеникот од редовите на владејачката ВМРО-ДПМНЕ, Бојан Стојаноски на денешната собраниска седница каде што се расправаше за интерпелацијата за министерот Панче Тошковски.
„Имаме можност денес да дебатираме по поднесената интерпелација за министерот Панче Тошковски. И мислам дека неколку работи денес треба да бидат кажани, директно кажани, јасно со цел да растуриме некои премиси кои што се создаваат во јавноста, како и која е целта на ова интерпелација, затоа што сметам дека многу неискреност има и многу зборови се споменаа во досегашните дискусии како морал, како одговорност, а за несреќа на оваа држава барем во претходните десет години можеме да направиме еден пример како се поставува по ваква трагедија, а како се постапувало, или не се постапувало во претходниот период, но и да видиме една одвратна малодушност и политички рефлектирано глодарство кое се граничи со мизерни и нечовечки особини“, рече Стојаноски на денешната собраниска седница каде што се расправаше за интерпелацијата за министерот Панче Тошковски.
Стојаноски е категоричен дека за поднесената интерпелација ќе биде потппишан писмен доказ за глодарство и злоба на политички актери кои што немаат никаков друг интерес освен политички да профитираат.
Македонија
Таравари на локалните оди со посебни советнички листи: Нема враќање назад

Министерот за здравство и лидер на едното крило од Алијансата за Албанците, Арбен Таравари, не отстапува од одлуката на локалните избори да одат со сопствени советнички листи иако на власт дојдоа како дел од коалицијата „Вреди“, која се подготвува да прерасне во една политичка партија.
„Засега имаме сигурна одлука дека одиме со посебни советнички листи и тоа е одлука на партијата и од тоа нема враќање назад. За сè друго сме подготвени и отворени да разговараме со сите во однос на локалните избори“, рече Таравари денес при посетата на вакциналниот пункт во Поликлиниката „Букурешт“.
И денес тој уверуваше дека владината коалиција е стабилна и има редовна комуникација со премиерот со кого очекува средба откога ќе се врати од службено патување.
Неговите досегашни коалициски партнери од „Вреди“, пак, сметаат дека Таравари сам се исклучил од коалицијата и треба да си замине и од Владата оти не може и да биде дел од Владата и да преговара со ДУИ.