Македонија
Џафери – Пич: Северна Македонија и Обединетото Кралство партнери и сојузници посветени на безбедноста преку единство

Претседателот на Владата на Република Северна Македонија, Талат Џафери, оствари средба со лордот Пич, специјален пратеник на премиерот на Обединетото Кралство на Велика Британија и Северна Ирска за Западен Балкан.
Џафери и Пич ги поздравија одличните билатерални односи меѓу двете земји и изразија очекување дека воспоставената активна динамика на соработка, средби и посети на високо ниво ќе продолжи со несмален интензитет.
Премиерот Џафери изрази задоволство што посетата на лордот Пич се случува во моменти кога Северна Македонија одбележува 4 години членство во НАТО и во годината кога алијансата одбележува 75 години постоење.
Притоа, заблагодарувајќи се на досегашната поддршка на лордот Пич на нашиот евро-атлантски пат и потсетувајќи на неговото лично присуство на историскиот момент на подигнување на знамето на Република Северна Македонија пред седиштето на НАТО во Брисел на 27 март 2020 година, премиерот ја нагласи одлучноста Северна Македонија да продолжи да биде активна и кредибилна членка на алијансата, посветена на безбедноста преку единството, како и нашата силна врска со Обединетото Кралство.
Упатувајќи честитки за годишнината од членството во НАТО, лордот Пич ја истакна посветеноста на Обединетото Кралство да продолжи активно да соработува со Северна Македонија како НАТО-сојузник и да продолжи да ја подржува модернизацијата на одбраната.
На средбата се разговараше за актуелни прашања од регионот на Западен Балкан, за предизвиците, можностите и важноста од движење на регионот напред, за безбедноста во Европа откога беснее војната во Украина и соработката меѓу двете земји како партнери и сојузници на тој план.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце и Богородица времето на чекање за влез во државата е околу 1 час

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини Табановце и Богородица времето на чекање за влез во државата изнесува околу 1 час. На останатите гранични премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Претпладне сончево, попладне наместа нестабилно со локален дожд и грмежи

Претпладне сончево со умерена облачност. Попладне наместа ќе биде нестабилно со локален дожд и грмежи. Ќе дува слаб до умерен ветер од југоисточен правец. Минималната температура ќе биде во интервал од 6 до 12, а максималната ќе достигне од 19 до 26 степени.
Во Скопје, сончево со умерена облачност и со слаб до умерен југоисточен ветер. Попладне во делови од котлината ќе има развој на нестабилна облачност со услови за пороен дожд и грмежи. Минималната температура ќе се спушти до 8, а максималната ќе достигне до 26 степени.
Времето во наредните денови
Од среда на повеќе места ќе биде нестабилно со повремени врнежи од дожд, локално поројни, проследени со грмежи. Дневната температура ќе биде во постепено благо опаѓање.
Македонија
Карпош, Ѓорче Петров и Сопиште денеска без струја

Од ЕВН Македонија АД известуваат дека денеска без електрична енергија ќе останат:
· Oд 08:00 до 16:00 часот, дел од корисниците во Стопански Двор. (Општина Ѓорче Петров);
· Oд 09:00 до 13:00 часот,ул.24 с.Сопиште КАЈ ИЦЕ МАК (Општина Сопиште);
· Oд 09:00 до 14:00 часот, дел од корисниците на ул.Ванчо Мицков,во Долно Нерези (Општина Карпош) ;
· Oд 10:00 до 14:30 часот, дел од потрошувачите на ул.Женевска (Општина Карпош).