Македонија
Џафери се сретна со британската амбасадорка, Рејчел Галовеј

Претседателот на Собранието Талат Џафери се сретна со амбасадорката на Обединетото Кралство во земјава, Н.Е. Рејчел Галовеј. Средбата беше по повод реизборот на претседателот Џафери на функцијата претседател на Собранието, како и изборот на новата Влада, со што се воспоставува целосна функционалност на највисоките државни институции во земјата.
Претседателот Џафери ги потенцираше исклучителните билатерални односи меѓу Република Северна Македонија и Обединетото Кралство, за кои сподели очекување дека ќе продолжат со зголемена динамика и во наредниот период. Информираше дека во наредниот период претстои формирање на комисиите, делегациите и пратеничките групи за билатерална соработка, како и зголемена заедничка работа како на пратениците од владејачкото мнозинство, така и на пратениците од опозицијата, особено во пресрет на започнувањето на преговорите со Европската унија. Истовремено, соочени со предизвиците од пандемијата со Ковид-19, сите заедно ќе треба консензуално да изградат деловничка основа за можност за работа на Собранието од далечина, особено за гласање од далечина, бидејќи неизвесноста со пандемијата во претстојниот есенски и зимски период е голема и ќе изискува ставање во располагање на сите капацитети за справување со овие ризици, како и донесување на времени правила за работа на Собранието во вонредна состојба.
Претседателот Џафери, осврнувајќи се на Брегзит, истакна дека Собранието стои на располагање брзо да се ратификуваат сите ревидирани трговски и економски договори меѓу нашата држава и Обединетото Кралство, за да може непречено да се одвива надворешно – трговската размена. Во контекст на соработката со НАТО, Република Северна Македонија како најнова земја – членка ќе соработува со британските колеги на рамноправна основа, придонесувајќи во колективната стабилност и глобалната безбедност. Претседателот на Собранието ја оцени како мошне успешна досегашната соработка со Вестминстер фондацијата за демократија, при што нагласи дека сите започнати проекти продолжуваат и понатаму со несмалена динамика.
Амбасадорката Галовеј информираше за новите услови на работа во Британскиот парламент, наметнати од ризиците од пандемијата со Ковид-19, и можноста британските пратеници да работат и гласаат од далечина. Понуди конкретна помош и поддршка во оваа област, во насока на споделување и користење на искуствата. Изрази позитивно очекување од натамошната реализација на проектите меѓу Собранието на Република Северна Македонија и Вестминстер фондацијата. Воедно, ја истакна силната политичка поддршка на новото Собрание и Влада, нагласувајќи ја потребата од натамошно заедничко градење на добри и коректни односи на релација власт – опозиција.
Соговорниците разменија мислења околу актуелните политички случувања во државата, активностите на Собранието и Владата во контекст на фокусирање кон предизвиците од пандемијата и прилагодувањето на животот на граѓаните кон новата состојба, дијалогот власт – опозиција како клучен императив на демократијата, можностите за унапредување на меѓупарламентарната соработка и споделување на заедничките искуства од надворешната политика и парламентарната дипломатија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.
Македонија
(Видео) Василевски: Нула нови градинки за 4 години во Аеродром, околу 700 деца чекаат за запишување секоја година

Изминаа речиси 4 години откако ВМРО-ДПМНЕ ја освои локалната власт. И По 4 години, ВМРО-ДПМНЕ во Општина Аеродром не изгради ниту една од ветените 4 нови градинки, рече денеска на прес-конференција Бојан Василевски, ОО СДСМ Аеродром.
„Овиe градинки беа првиот од 7-те топ приоритети на Муцунски и Митески во програмата со кои ја освоија довербата на нашите сограѓани од Аеродром. Митески и Муцунски ветија целосно нови градинки во Острово, Мичурин, Лисиче и Долно Лисиче, но еве, четири години подоцна, ниту една од овие ветени градинки до денес не е ни започната со градба“, вели Василевски.
Според него, околу 700 дечиња годишно се на листа за чекање за упис во градинка, заради недостатокот на места во градинките во Аеродром.
„ВМРО-ДПМНЕ во Аеродром покажа целосна незаинтересираност за решавање на овој проблем. Единствениот објект на градинка кој се гради во моментов во Стар Аеродром е со 70.000.000 денари, средства обезбедени од Владата на СДСМ во 2024 година. Само за споредба, кога со Општина Аеродром управуваше СДСМ се изградија 2 нови градинки со вкупен капацитет од 400 деца. Целосно нов објект Црвенкапа во Стар Аеродром со капацитет од 200 деца и целосно нов објект Буба Мара во Ново Лисиче со капацитет од исто така 200 деца“, кажа Василевски.