Претседателот на Собранието, Талат Џафери, oствари кратка средба со претседателката на Европската комисија, Урсула фон дер Лаен, пред нејзиното предвидено обраќање пред пратениците во Собранието. На средбата присуствуваше и генералната секретарка на Собранието, Цветанка Иванова.

Џафери истакна дека стратешки цели на државата од нејзиното осамостојување се членството во НАТО и во Европската Унија и изрази уверување дека во моментот кога земјата е на прагот да го почне процесот на преговори, кој треба да доведе до исполнувањето на втората стратешка цел, пратениците ќе го изберат вистинскиот пат. Тој нагласи дека одлуките се носат во согласност со почитување на главните прашања за кои се изразува загриженост во јавноста, како македонскиот јазик, културата, историјата и идентитетот. Македонскиот јазик ќе биде регистриран без фусноти, потенцира Џафери. Тој изрази уверување дека времето ќе покаже дека била донесена вистинската одлука.

Претседателката Урсула фон дер Лаен истакна дека ѝ е чест да биде во земјата во вакви одлучувачки моменти, дека во Европската Унија се свесни оти државата постигна многу досега и дека се движи во вистинскиот правец. Таа изрази надеж дека ревидираниот француски предлог, кој ги штити македонскиот идентитет и јазик, ќе наиде на одобрување и потсети на мотото на ЕУ: „Обединети во различностите“. Таа нагласи дека со внимание ќе го следат гласањето во Собранието и дека по одржувањето на првата меѓувладина конференција, веднаш би почнал процесот на скрининг. „Ве чекаме во ЕУ“, заклучи Урсула вон дер Лаен.

Џафери, заблагодарувајќи се на охрабрувањето, рече дека верува во решителноста на 27 земји членки по 17 години чекање да го откочат процесот и дека отворањето на преговорите ќе го намали притисокот во јавноста. Исто така, изрази очекување процесот да биде финализиран во догледно време.