Македонија
Општина Кисела Вода санира три улици во УЗ Цветан Димов

Продолжува градежната офанзива низ улиците на општина Кисела Вода. Во моментов, градежни активности се одвиваат во урбаната заедница Цветан Димов, каде се врши санација на неколку улици. Нов асфалт ќе добијат “Тоне Томшиќ”, крак на улицата “Мишко Михајловски” и дел од “Дичо Петров”.
Се работи за површина од околу 2300 квадратни метри, која на жителите од овој дел на Кисела Вода ќе им овозможи подобри и побезбедни услови за сообраќај, како и подобра естетика на просторот. Се планира овој градежен зафат да биде готов до крајот на следната недела.
Паралелно, обнова на асфалтот се врши и во урбаната заедница Кисела Вода, каде се интервенира на дел од улицата “Димо Хаџи Димов” и на улицата “Марко Орешковиќ”.
Како што во повеќе наврати истакна градоначалникот Ѓорѓиевски, обновата на патната инфраструктура која во голема мера го условува и економскиот развој на општината, ќе ги опфати сите месни и урбани заедници, со цел равојот на Кисела Вода да биде рамномерен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Кузеска: Доставивме документи до ДКСК, бараме итна постапка за скандалозниот тендер во МВР

СДСМ достави документи до Државната комисија за спречување на корупцијата и бара итна постапка за, како што велат, скандалозниот тендер во МВР.
„Секој ден власта ја тресат корупциски скандали. Буквално смрди на коруцпија во врвот на власта. Последен е скандалозниот тендер во МВР од 4 милиони евра кој го добива и фирма основана 20 дена пред распишување на тендерот. Фирма без искуство, без капацитет, а вчера видовме и дека е без седиште. Фаном фирма ли е? Како е можно ваква фирма да добие тендер за специјализирана опрема за полицијата?“, праша портпаролката на СДСМ, Богданка Кузеска.
Според неа, ова е огромен скандал поврзан со Панче Тошковски кој бара итна институционална реакција.
„Денеска сме пред Државната комисија за спречување на корупцијата, да побараме итно постапување по овие сериозните сомнежи за корупција. Ќе и предадеме документи. Да се истражи до крај, дали станува збор за местен тендер, однапред договорен? Чии интереси стојат зад овој тендер вреден 4 милиони евра? ДКСК мора да отвори предмет, да ги истражи сите факти и конечно – да обезбеди одговорност. Време е ДКСК да покаже дека не се неми набљудувачи на криминалот, туку бранители на јавниот интерес“, рече Кузеска.
Македонија
Доаѓа лето: од недела пораст на температурите

До крајот на неделата времето ќе биде променливо облачно со врнежи од дожд, а од недела ќе има значителен пораст на температурите, информира УХРМ.
Утре ќе има повремени врнежи од дожд, наместа пообилни (10 до 15 l/m²). Локално ќе има услови за појава на нестабилност со пороен дожд, грмежи и засилен ветер. Во петок и во
сабота ќе дува умерен до засилен северен ветер и ќе има изолирана појава на пороен дожд.
Од недела следува период на претежно стабилно и топло време со значителен пораст на дневните температури.
Македонија
Мицевски: Договорот со Обединетото кралство во собраниска процедура, истoриски чин за Македонија

Во Собранието почна Комисијата за надворешни работи на Собранието каде точка на дневен ред е Предлог законот за ратификација на договорот меѓу владата на Обединетото Кралство и Македонија. Овој договор е историски чин за Македонија, затоа што претставува цврст темел за односите со една од најголемите светски сили и мотор на финансиите, науката и иновациите, изјави пратеникот од ВМРО-ДПМНЕ, Никола Мицевски.
Според него, овој договор е основа на едно стратешко поврзување со една од најмоќните политички и економски сили во светот.
„Овој договор, на Македонија ќе и овозможи стратешка позиционираност во регионот, развој на инфраструктурата, здравството, енергетиката, науката, зацврстување на институциите. Македонија ќе може да ја направи железницата долж Коридорот 10, во две железнички линии, од кои едната ќе биде брза железница за возови над 160км на час, а другата линија за товарен транспорт. Линијата за товарен транспорт ќе ја подигне стратешката важност на Македонија и ќе го зголеми протокот на стоки низ државата од пристаништата во Грција кон Средна Европа. Само по основ на транзит, очекувано е државата секоја година да инкасира од 100 до 120 милиони евра. Ќе ја трансформираме државата на здравствен план. Овој договор ќе овозможи доизградба на Клиничкиот центар во Штип, медицински факултет и нов студентски дом, изградба на болница во Кичево и Тетово“, рече Мицевски.
Тој рече дека договорот не е класифициран и не се чува во четири ѕида како претходните на владата на СДС и ДУИ.
„Се’ е транспарентно, затоа што и придобивките се јавни и достапни за граѓаните. Повикувам на зрелост и конструктивност од опозицијата предводена од СДС и ДУИ. Ова не е договор на ВМРО-ДПМНЕ, туку на Македонија, за сите граѓани. Неговото отфрлање е одење против народот и интересите на Македонија“, рече Мицевски.