Артан Груби направи милионски криминал во влада чиј премиер беше од СДС, во влада каде МВР го водеше СДС и влада во чие време судството и обвинителството испорачуваа под партиски притисок. Во такво време нема никаква можност СДС да не знаеле за криминалот на Груби, кажа на прес-конференција пратеникот од редовите на ВМРО-ДПМНЕ, Миле Лефков.

Повеќе од јасно е, како што вели, дека го одмолчеле, а сега исто како тогаш го одмолчуваат и мислат дека народот ќе им заборави.

„СДС треба да знаат дека најмалку што му должат на народот е извинување за криминалите кои дозволија да ги направи Артан Груби.

Македонија тонеше со години, затоа што Груби и таквите како него крадеа.

Одговорноста дојде и одговорност за секој има“.

Само СДС како политичка партија не сфати, вели пратеникот од ВМРО-ДПМНР, дека мора да излезе и не само јавно да се огради од Груби, туку и да се извини за него.

Трет ден по ред вработените во неколку министерства и државни институции излегоа на получасовен протест за 30 отсто поголема плата и потпишување колективни договори со кои ќе се изедначат со колегите во министерствата кои добиваат поголеми плати. Претседателот на Синдикатот на вработените во управата, правосудните органи и здруженијата на граѓаните (УПОЗ), Трпе Деаноски, пред Државниот завод за статистика на Владата и одржа лекција што е штрајк, а што е протест.

„Денес сме пред Државниот завод за статистика, институција специфична по обемот и делокругот на својата работа, а вработените се со едни од најниските плати во државата. Сакам да ја потсетам Владата дека ова е протест, а не штрајк иако Владата секојдневно го кажува тоа. Штрајк значи неизвршување на работни задачи. Доколку вработените од Државниот завод за статистика не извршат само една работна задача од својот делокруг, а тоа е пресметка и објава на просечна месечна плата на ниво на држава, ќе се доведе во прашање работата на многу институции, а последиците ќе ги трпат граѓаните. Членовите на Синдикатот на УПОЗ се одлучија да го изразат своето незадоволство токму преку одржување на получасовен протест за граѓаните и приватниот сектор да не трпат никакви последици“, рече Деаноски.

Тој нагласи дека проблемот на вработените може да се реши со согласност од Министерството за финансии да ги користат средствата кои ги имаат во буџетот, а по ставот на Владата дека УПОЗ доаѓа на седниците на

Еконосмко-социјалниот совет, Деаноски јавно посочи дека на тие седници се решаваат покрупни прашања како што се општиот колективен договор и минималната плата. Барањата што ги имаат вработените кои сега излегуваат на протести се решаваат со ресорните министри и Министерството за финансии.

Деаноски и денес ја критикуваше Владата за ставовите што ги објавува по секој протест на административците откога вчера повика на дијалог за решавање на проблемот.

„Владата наместо да питува соопштенија и да негира се што ќе кажеме ние, а не е воопшто во право, треба да посвети малку енергија и да најде начин како да го реши овој проблем. Ако Владата сакаше дијалог досега ќе бевме седнати на маса, немаше да бидеме на улица“, рече Деаноски.

Тој веќе три дена, за време на секој протест, кажува дека уште пред усвојување на буџетот за 2025 година ги завршивме сите средби со ресорните министри, добиле поддршка од нив, потоа направиле колективни договори кои не се потпишани иако нема ниту правна ниту уставна пречка за нивно потпишување.

Протестираат вработените од Министерството за животна средина и просторно планирање, Министерството за дигитална трансформација, Министерството за земјоделство, Министерството за правда, Министерството за култура и туризам, Министерството за економија и труд, Министерството за транспорт, Државниот завод за статистика и Државниот архив.

Утре протестот ќе биде пред Министерството за финансии каде што Синдикатот ќе ги каже следните чекори.

Социјалдемократскиот сојуз на Македонија го изразува своето незадоволство и загриженост за третманот кој актуелната власт, предводена од Христијан Мицковски и министерката Весна Јаневска, го покажува кон просветните работници, истакна на прес-конференција Жаклина Лазаревска од СДСМ.

Според неа, додека трошоците за живот растат и се поскапува, граѓаните и работниците имаат се помалку пари, а власта на ДПМНЕ ги останава на цедило и наставниците.

„Наместо да го вреднуваат трудот на наставниците и да обезбедат вистинско подобрување на нивниот животен стандард, Власта со потценувачки решенија го деградираат достоинството на оваа благородна професија. Според законската обврска, платите на наставниците требаше да бидат зголемени за 12,15% од септември 2024 година, што би значело просечно зголемување од 4.300 денари.
Но, тоа не се случи. Реалноста е понижувачка – зголемувањето од едвај 5% пристигна дури во октомври, оставајќи ги наставниците без заслуженото за нивниот труд“, вели Лазаревска.

Со ова, како што рече, наставниците и просветните работниците се оштетени.

„Дополнително, најавените зголемувања од 7,5% во март 2025 година и нејасните ветувања за идни зголемувања од 7,5-10% секој март се далеку од тоа што им следува и што треба да го добијат просветните работници.
Секако и далеку од она што го реализираше СДСМ во изминатите години. СДСМ покажа дека образованието е приоритет“.

ВМРО-ДПМНЕ, додава таа, покажува дека нема капацитет да ги препознае вистинските приоритети.

Како што истакна, пари за образование има, прашањето е само за што се користат.

Наставниците, појасни Лазаревска, заслужуваат достоинствен третман и вистински услови за работа.

Најави дека СДСМ ќе продолжи да се бори за подобрување на условите во образованието, бидејќи образованието е темелот на иднината, а достоинството на наставниците мора да биде заштитено.