Во текот на вчерашниот ден, полициски службеници на целата територија на државата лишија од слобода 11 возачи, од кои еден во Штип и еден во Демир Капија поради управување возило под дејство на алкохол, двајца во Битола затоа што управувале возило без да поседуваат возачка дозвола и седум возачи (двајца во Велес и по еден во Тетово, Куманово, Свети Николе, Битола и Ресен) затоа што управувале возило иако имале мерка забрана за управување моторно возило од Б категорија.

Возачот во Демир Капија претходно се заканувал на неговата сопруга и со тврд предмет го нападнал неговиот татко. Лицата се приведени во полициска станица, а по насоки на јавен обвинител возилата се одземени и по целосно документирање на случаите ќе бидат поднесени соодветни кривични пријави.

„Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит или доколку имаат изречена мерка за забрана за управување или доколку се под дејство на алкохол и сите заеднички да придонесеме за побезбеден сообраќај“, велат од МВР.

Република Северна Македонија и годинава бележи 40 поени на Индексот за перцепција на корупцијата, што значи дека нема суштински напредок во борбата против корупцијата, туку има константа како почетна точка од која работите треба да тргнат на подобро, велат од Транспаренси интернешнл.

„Формално сме позиционирани четири места подобро на ранг-листата од минатата година 84 позиција. Ова подобрување покажува дека минатата година во борбата против корупцијата ни одело подобро од 4 други држави“, се наведува во соопштението.

Од Транспаренси интернешнл велат дека клучните системски проблеми и понатаму остануваат неуспешните и недовршени реформи во судството и обвинителството, кои не успеваат да обезбедат ефикасен, независен и одговорен правосуден систем. Дополнително, велат од таму, случувањата поврзани со поранешната претседателка на Државната комисија за спречување на корупцијата сериозно ја нарушила довербата на јавноста во институциите задолжени за борба против корупцијата.

„Загрижува и нетранспарентниот процес на изготвување на измените на Кривичниот законик, како и нивната содржина, која не само што не придонесе за зајакнување на антикорупциската рамка, туку во одредени сегменти ја ослаби. Исто така, се уште не се донесени и новиот Закон за укажувачи, како и измените на Законот за спречување на корупција и судир на интереси, едни од најважните закони во борбата против корупцијата“, се наведува во соопштението.

Според Транспаренси интернешнл, овие резултати испраќаат јасна порака: без вистинска политичка волја, транспарентни процеси и отчетни институции, Северна Македонија ќе остане заглавена во стагнација. Според нив, борбата против корупцијата мора да се третира како врвен државен приоритет, а не како декларативна заложба.

Министерот за дигитална трансформација, Стефан Андоновски, еден од главните говорници на Budapest Global Dialogue 2026, истакна дека стратешката соработка меѓу државите и партнерите е суштинска за градење отпорни институции, стабилни демократии и безбедна дигитална инфраструктура во услови на зголемени глобални предизвици.

Настанот започна со воведно обраќање на министерот за надворешни работи и трговија на Република Унгарија, Петер Сијарто, по што следуваа високи панел-дискусии посветени на глобалната безбедност, геополитичките промени и дигиталната трансформација.

Во своето обраќање, министерот Андоновски нагласи дека светот се наоѓа во период на длабоки и комплексни промени.

„Денес се соочуваме со меѓународен поредок кој е под притисок на повеќе фронтови, воени, финансиски и демографски. Мултиполарноста повеќе не е тема за дискусија, туку реалност со која мораме одговорно да управуваме“, истакна Андоновски.

Тој предупреди дека сајбер-нападите врз критичната инфраструктура не се виртуелна закана, туку реален ризик со директни последици врз државите и секојдневието на граѓаните.

„Кога болници, енергетски мрежи, водоснабдителни системи или финансиска инфраструктура се мета на сајбер-напади, последиците се длабоко реални – нарушени животи, ослабени институции и зголемен ризик од ескалација“, порача министерот.

Андоновски посочи и на опасностите од дезинформациите и технолошките зависности:

„Кога дезинформациите ја разоруваат јавната доверба, демократиите потешко функционираат, а општествата ја губат кохезијата. Кога синџирите на снабдување со критични технологии стануваат средство за притисок, тогаш суверенитетот станува условен.“

Од перспектива на Република Македонија, како членка на НАТО и држава со јасна евроатлантска ориентација, министерот нагласи дека отпорноста на државите е темелот на секое успешно партнерство.

„Ние сме мала држава, но се наоѓаме на пресек на региони, пазари и стратешки интереси. Знаеме дека сојузништвата се клучни, но исто така знаеме дека силата на секој сојуз зависи од отпорноста на секој негов член“, истакна Андоновски.

Тој нагласи дека сајбер безбедноста мора да се третира како национална безбедност, а не како техничка формалност.

„Сајбер безбедноста не смее да биде додадена на крајот од проектите. Таа мора да биде вградена во начинот на кој функционираат Владите, како се набавува инфраструктурата, како се испорачуваат јавните услуги и како се управува со кризи.“

Во вториот дел од обраќањето, министерот Андоновски се осврна на значењето на дигиталната трансформација за јакнење на јавната доверба.

„Дигиталната трансформација треба да ја направи државата потранспарентна, подостапна и поодговорна. Кога граѓаните добиваат ефикасни услуги, а бизнисите работат во предвидлива и безбедна средина тогаш се зајакнува општествениот договор меѓу државата и граѓаните.“

Министерот истакна дека стратешката соработка мора да биде конкретна и оперативна:

„Тоа значи заедничка борба против сајбер-криминал, измами и рансомвер, споделување на најдобри практики, градење релации за брз одговор на инциденти и јакнење на нормите што го намалуваат ризикот од погрешни проценки и ескалација.“

Во рамки на својата посета на Будимпешта, министерот Андоновски ќе оствари неколку билатерални средби со високи владини претставници, како и посета на Министерството за енергетика на Република Унгарија, при што ќе се разговара за можностите за унапредување на соработката во областа на дигиталната трансформација, сајбер-безбедноста и поврзувањето на енергетските и дигиталните системи.