Македонија покажува подобрување во областа на почитувањето на човековите права во 2009 та година, но се уште се присутни постојаните предизвици.Ова се наведува во Извештајот на Стејт департментот за почитување на човековите права, објавен денеска во Вашингтон

Македонија покажува подобрување во областа на почитувањето на човековите права во 2009 та година, но се уште се присутни постојаните предизвици.

Ова се наведува во Извештајот на Стејт департментот за почитување на човековите права, објавен денеска во Вашингтон.

Извештајот за 2009 за Македонија покажува подобрување во спроведувањето на претседателските и општински избори, во споредба со парламентарните избори во 2008.

Според извештајот,  прогрес е остварен во издавање дозвола и овозможување соодветна безбедносна заштита за маршот низ центарот на Скопје во ноември, организиран од страна на невладината организација која промовира толеранција за хомосексуалците, бисексуалците, и транссексуалците, под мотото “љубов е љубов”.

Исто така, се истакнува и ноемвриското усвојување на Националниот план за интеграција на бегалци и странци, кој се фокусира на домување, образование, здравство, социјална заштита, вработување и развој на заедницата.

Во извештајот подетално пишува и за ефективните напори на владата и на невладините организации во борбата против трговијата со луѓе и обезбедувањето заштита и помош за жртвите.

Сепак извештајот го насочува вниманието кон постојаните предизвици во многу области во текот на 2009, вклучувајќи ги нецелосна имплементација на судските реформи, меѓуетнички и меѓурелигиски тензии, недостаток на подобрување на условите во затворите, и недостаток на сеопфатно законодавство против дискриминација.

Извештајот го посочува и недостатокот на соодветна заштита на оние кои во март месец протестираа против владините планови за изградба на православна црква на градскиот плоштад во Скопје, што доведе до насилство и попречување на одржување на протестот.

Извештајот на Стејт департментот игра важна улога во напорите на САД за промовирање на почит кон човековите права насекаде низ светот и има за цел да ги зголеми напорите, на светско ниво, за ставање крај на злоупотребата, за зајакнување на капацитетите на државите за заштита на човековите права на сите, и истакнување на оние држави кои не се придржуваат до меѓународните стандарди за човекови права./крај/мп