Опозициската ВМРО-ДПМНЕ за утре најави блокади во Скопје и протести во 15 града на кои ќе бара оставка од премиерот Зоран Заев.

„Нема да дозволиме понижување и распродажба на државните и националните интереси и токму затоа сите заедно сплотени, во масовен број, ќе испратиме порака дека Зоран Заев и СДСМ мора да си заминат што побргу бидејќи на Македонија ѝ донесоа само порази и неуспеси“, велат од опозициската партија.

ВМРО-ДПМНЕ ги повикува граѓаните, утре, во 15 часот, да им се приклучат на блокадите пред Владата и Министерството за надворешни работи. Протести со почеток од 18 часот ќе се одржат и во Куманово, Македонска Каменица, Пробиштип, Делчево, Пехчево, Берово, Виница, Радовиш, Валандово, Дојран, Велес, Кавадарци, Прилеп, Битола и во Охрид.

ВМРО-ДПМНЕ и во Собранието и надвор од него не прави ништо во интерес на граѓаните, напротив, само лаже и се однесува деструктивно, порача пратеникот на СДСМ, Костадин Костадинов, на денешната седница на Комисијата за финансирање и буџет во Собранието.

„Вашето однесување често потсетува на режим, на едно време кога овде во оваа сала се тепаа пратеници, само затоа што имале поинакво мислење од вашиот лидер“, порача Костадинов обраќајќи се кон пратениците од редовите на ВМРО-ДПМНЕ и додаде дека токму ВМРО-ДПМНЕ со неодговорното однесување го загрозува јавното здравје.

Костадинов посочи дека ВМРО-ДПМНЕ не направила ништо позитивно за државата, а за време на кризата предизвикана од коронавирусот постојано ги игнорира мерките и тера дневна политика со здравјето на граѓаните.

Во обраќањето Костадинов посочи дека навикната на времето на режимот, ВМРО-ДПМНЕ во Собранието се обидува да ја спречи слободата на говор за да не се види на дело нивното лицемерство кон граѓаните.

„Партијата ВМРО-ДПМНЕ 11 години се обидуваше на македонскиот народ да му инсталира поинаков идентитет од тоа што да инсталира антички идентитет и со тоа направи сериозни проблеми. Партијата што го смени името на улицата Бихаќска, каде што во ноември 1942 година е одржано Првото заседание на АВНОЈ, со што е потврдена сувереноста на македонскиот народ, сега глуми патриотизам. Партијата што се обиде да го забрани празнувањето на Февруаскиот поход сега глуми дека во нејзините редови се најголемите партизани. ВМРО-ДПМНЕ поставуваше споменици во вредност од една милијарда евра и немаше храброст да ги именува со вистинските имиња, а денес глуми патриотизам. ВМРО-ДПМНЕ денеска шири загриженост и шири хистерија дека е нарушен македонскиот идентитет, дека е загрозен македонскиот јазик. ВМРО-ДПМНЕ не прави ништо друго, освен што лаже“, порача Костадинов.

Владата на седница го утврди предлог-законот за реализација на проектот „Нов универзитетски клинички центар“.

Овој закон е по предлог на Министерството за здравство, а со него се уредуваат постапката и условите за реализација на проектот, односно изградба и ставање во употреба на комплексот на градби како градби од значење за Републиката.

Од Владата велат дека со предложените решенија ќе се овозможи унапредување на ефективноста и ефикасноста на терциерното здравство во земјата преку реализација на проектот „Нов универзитетски клинички центар“ и ќе се обезбеди континуитет во обезбедувањето висококвалитетни здравствени услуги за населението на целата држава.

„Предлог-законот опфаќа и реализација на дополнителни инфраструктурни услови за третман и сузбивање заразни болести и инфекции заради заштита на населението од заразни болести, оптимизација на времето, трошоците или другите ресурси, со цел ефикасна реализација на проектот ‘Нов универзитетски клинички центар’ преку посебни услови и постапки за доделување договори за јавна набавка на стоки, услуги и работи за потребите на проектот ‘Нов универзитетски клинички центар’, како и други прашања уредени со овој предлог-закон“, информираат од Владата.

Финансиските средства за реализација на овој болнички комплекс ќе се обезбедат од буџетот на Република Северна Македонија.