Во Аеродром, на булеварот АСНОМ, се засадија 300 нови листопадни и зимзелни дрвја, кои веќе напролет ќе развијат убави крошни, чии сенки ќе придонесат за намалување на температурата во жешките месеци и овозможување попријатни услови за прошетки во овој дел на Скопје.

„Со овој дрворед ги потврдуваме новите стандарди на квалитет што го воведовме во текот на изминативе три години во нашиот град. Овде на булеварот АСНОМ се засадени 300 висококвалитетни дрвја. Непосредно зад дрворедот на листопадните дрвја можете да ги видите дрвјата што претходно биле засадувани од моите претходници, кои сè уште се со послаб квалитет и во големина и во развојот на крошната од оние што ние изминатава недела ги засадивме, и токму тоа се стандардите за кои јас денес зборувам. Овде имаме типични примери во општина Аеродром, во непосредна близина го имаме булеварот Србија, кој нема тротоар од едната страна, а од другата страна лани ја изградивме велосипедската патека, го имате во Лисиче булеварот Трета македонска бригада, каде што поради лошото планирање, еден сервис за миење автомобили ни стоеше околу четири или пет години на трасата и сега еве го булеварот АСНОМ“, рече градоначалникот Петре Шилегов на прес-конференцијата.

Тој додаде дека булеварот АСНОМ е модерно булеварско решение со три коловозни ленти во секоја насока, тротоари и велосипедски патеки, средишно и странично зеленило со прекрасни дрвореди од двете страни, урбана опрема со клупи и корпи за отпадоци и соодветно осветление. Шилегов изрази уверување дека граѓаните забележуваат дека сите нови булевари Град Скопје ги гради во согласност со овие стандарди, а и не само новите, туку по овие стандарди се преуредуваат и постојните на местата каде што тоа го дозволуваат просторните услови.

„Засадуваме висококвалитетни садници кои веднаш влегуваат во екоситемот на нашиот град, толку потребно за прочистување на воздухот како дел од секојдневната посветеност и моја, на градските претпријатија и на градската администрацијата. Тоа се стандардите што јас како градоначалник на овој град ги воведувам и ги охрабрувам и сите градоначалници да ги следат овие стандарди при изградбата на инфраструктурите објекти“, нагласи Шилегов.

На засадувањето на садниците од двете страни на булеварот АСНОМ присуствуваа и претседателката на Советот на Град Скопје, Љубица Јанчева, градоначалникот на општина Аеродром, Златко Марин, и директорот на ЈП „Паркови и зеленило“, Адријан Муча.

Зоран Заев е човекот шот ја обезличи Република Македонија и го обесчести македонскиот народ, единствено за свои лични интереси, рече на денешната прес-конференција, портпаролот на ВМРО-ДПМНЕ, Димче Арсовски.

„Наместо да молчи и да се однесува како кукавица, со што ќе се обиде повторно да им забие нож во грбот на граѓаните и да ги обезличи уште повеќе, нека се охрабри и нека говори јавно за целиот проблем, начинот и текот на преговарање со источниот сосед“, повика партискиот портпарол.

Како што рече Арсовски, од коалициски партнер на СДСМ јавноста дознала дека Владата на Зоран Заев дала понуда до бугарската страна за деблокирање на интеграциите.

„Сакаме да прашаме, а Заев мора веднаш да одговори, што содржи таа понуда што ја дала Владата на Заев до бугарската страна? Од што се откажува Зоран Заев и каква штета трпат граѓаните и државата поради неговата понуда за нов договор и деблокирање на интеграциите? Што сè има понудено Зоран Заев во таа нова понуда?“, запраша претставникот на опозициската партија и додаде дека постојат информации оти Заев има ветувано и други концесии кон бугарската страна.

„Во прашање се сериозни бизнис-ветувања од Зоран Заев кон бугарската страна, поголем пакет кој вклучува сериозен приватен и државен капитал, кој требало да биде продаден на бугарски фирми и бугарски бизнисмени. Тука би набројале една поголема банка, државниот удел на Република Македонија во ‘Телеком’, што ќе значи и целосно приватизирање, железнички транспорт, ТЕЦ ‘Неготино’, земјоделско земјиште, кое наводно и веќе било капарисано од одредени луѓе што треба да стане градежно, и уште многу други работи“, нагласи Арсовски и порача дека во моментот потребна е влада на национален спас, и тоа уште веднаш.

Неколку скопски населби денес околу пладне останаа без струја. Од ЕВН објаснуваат дека дефектот е во трафостаница на МЕПСО, од каде што добиле струја со висок напон, поради што снабдувањето автоматски било прекинато за да не се случи оштетување на мрежата. Снема струја во делови од Центар, Капиштец, Тафталиџе, Козле и од Ѓорче Петров.

„Од МЕПСО добивме струја со повисок напон и се вклучи заштитата поради што беше блокирано снабдувањето со струја. Технички не е можно во мрежата на ЕВН да се извшри прием на струја со повисок напон. Во нашата мрежа нема дефект, но струја нема оти чекаме да се стабилизира напонот на струјата што ја добиваме од МЕПСО“, објасни Ленче Карпузовска, менаџер на одделот за маркетинг и комуникации во ЕВН.

Одредени делови, во кои снема струја, веќе се приклучени на системот. Од ЕВН уверуваат дека како ќе паѓа напонот на струјата што ја добиваат од МЕПСО, така корисниците повторно се поврзуваат. Во некои населби прекинот траел 15 минути, а други сè уште чекаат да им дојде струја.