Македонско-бугарската Мешовита комисија за историски и образовни прашања и денеска ќе расправа за средновековниот и раноосманлискиот период, по состанокот одржан во текот на вчерашниот ден.

Тема на онлајн состанокот е и евентуалното заедничко чествување на Гоце Делчев.

Премиерот Зоран Заев вчера оцени дека работата на Комисијата се одвива во пријателска атмосфера и изрази уверување дека набрзо ќе има и решенија. Тој повтори дека на средбите не се преговара за македонскиот идентитет и за македонскиот јазик.

Заев смета дека разговорите треба да продолжат без разлика на исходот од средбите на ниво на ЕУ на 10 или 18 декември, на кои треба да се донесе одлуката за усвојување на преговарачката рамка на Унијата со земјава.

Рече дека Владата е подготвена да ги објави записниците за петте историски личности за коишто бил постигнат договор.

„Нашата Влада од досега усвоените записници е подготвена на некоја од следните седници да ги објави записниците за петте историски личности, односно трите историски периоди за да испратиме порака, дека веднаш после тоа започнуваме со импелемнатција на учебниците за 2021-22 година и од бугарска и од македонска страна, за сето она што е поврзано со Цар Самоил, Кирил и Методиј, Климент и Наум Охридски“, изјави Заев, одговарајќи на новинарски прашања по отворањето на фотонапонска централа во Неготино.

Министерот за надворешни работи, Бујар Османи, истакна дека ќе биде вратена довербата во Договорот за добрососедство со Бугарија доколку денеска на онлајн средбата македонската и бугарската историска комисија ги доближат ставовите за Гоце Делчев.

Седумнаесет научни работници од Институт за македонски јазик „Крсте Мисирков“ преку писмен допис апелираа политичарите да не подлегнат на притисоците и наметнувањата на, како што велат, бугарската негаторска политика. Претходно реагираа и од Институтот за историја, МАНУ и УКИМ.

Здравствените производи со сертифициран квалитет треба да бидат достапни за сите, истакна претседателот Стево Пендаровски во обраќање на специјалнатата сесија на Генералното собрание на Обединетите нации, посветена на пандемијата на Ковид-19.

Тој оцени дека голем чекор во вистинска насока е воспоставувањето на глобалната програма COVAX за набавка на вакцини, која треба да овозможи лесен и балансиран пристап до вакцините на сите луѓе во светот.

Претседателот Пендаровски се заблагодари на Обединетите нации и Светската здравствена организација за лидерството во координирањето на напорите на глобално ниво за контрола и спречување на ширењето на Ковид-19, како и на сите земји и организации кои ни дадоа поддршка со медицинска опрема и материјали, како и споделување на знаење и искуство.

„Пандемијата како системска закана бара системски одговор“, порача претседателот и додаде дека треба заедно да продолжиме да работиме во создавањето на издржливи, добро управувани, одговорни, отчетни здравствени системи кои им служат на граѓаните.

Говорејќи за ситуацијата во Македонија со корона-кризата, Пендаровски рече дека пандемијата го зела својот данок во човечки животи, извршила притисок врз здравствениот сектор и ја ослабела економијата.

„Владата неодамна прогласи кризна состојба на целата територија на Република Северна Македонија за период од 30 дена. На овој начин ќе се помогне да се искористат капацитетите на Армијата и ресурсите на приватниот здравствен сектор со цел поефикасно да се контролира ширењето на вирусот и да се спасат што е можно повеќе човечки животи“, рече Пендаровски.

Тој додаде дека економијата може да страда, но животите на луѓето се бесценети, па затоа спасувањето човечки животи треба да има предност пред сè друго. Во исто време, како што нагласи Пендаровски, нашите напори за контрола на ширењето на вирусот не смеат да бидат на штета на основните права и слободи, што поздразбира здравствена заштита и економски стимул за сите кои имаат потреба.

На сесијата што се одржува во рамки на Генералното собрание на Обединетите нации земаа учество над 150 шефови на држави, влади и министри.

Градоначалниците на општините Битола и Гостивар – Наташа Петровска и Арбен Таравари, преку социјалните мрежи известија дека се заразени со коронавирус.

„По резултатите од денешниот направен тест се утврди дека сум позитивна од COVID 19. Следните денови согласно препораките останувам во изолација. Бидете во добро здравје!“, напиша Петровска.

„Почитувани пријатели и колеги, штотуку го добив резултатот од тестот и се покажа дека сум заразен со вирусот SarasCov-2. Мојата информација има за цел да помогне во епидемиолошката истрага и да ја подигне свеста што е можно повеќе за спроведувањето на мерките. Сите сме во ова оро, никој не може да се заштити сам. Со тоа што не спроведуваме анти-ковид мерки, своеволно се претвараме во оружје еден за друг. Јас ке бидам под силен надзор на лекарите, и благовремено ќе ве информирам за сè, напиша Таравари во својата објава на фејсбук.