Повеќето учебници нудат дискриминаторски перспективи кон лицата со поинаква сексуална ориентација, а понудените информации развиваат негативни стеретотипни вредности кај учениците, се вели во извештајот од истражувањето на Х.Е.Р.А.

Повеќето учебници нудат дискриминаторски перспективи кон лицата со поинаква сексуална ориентација, а понудените информации развиваат негативни стеретотипни вредности кај учениците, се вели во извештајот од истражувањето на Х.Е.Р.А. Истражувањето, насловено „Љубов само по часови“, направено меѓу учениците и за учениците, претставува една општа проценка на состојбата на сексуалното образование во земјата. Според извештајот на Х.Е.Р.А., организација која се залага за воведувањето на сексуалното образование во училиштата, кај учениците не се подига свеста од потребата за борба против дискриминацијата, негативните стереотипи или предрасуди. „Во учебникот „Граѓанско образование“, во темата „Општествени отстапувања (девијации)“, како примери за „различни начини на однесување врзани за секојдневниот живот на човекот“ се споменуваат „невоспитано однесување, хомосексуализам, бездомништво“ (стр.26), се вели во извештајот на  Х.Е.Р.А. Според нив, во еден друг учебник, „Педагогија“, во делот насловен „Негативни појави на сексуалниот живот“, хомосексуалноста е наброена заедно со проституцијата, половите болести и половото силување. Според авторките, хомосексуалноста и лезбејството се „опачини“ а „учесниците на таков изопачен, неприроден и, што би рекле, ненормален сексуален живот се личности со психички потешкотии и пречки“ (стр.203). Во одредени контексти, дури и љубовта во пубертетот е проблем односно без љубов, половиот нагон не е нормален ниту природен: „Половиот нагон кој, пред се, е само физички, не е нормален за човекот, а е својствен само за животните и се применува за размножување“ (Педагогија, стр.201), откриваат во истражувањето. Од Х.Е.Р.А порачуваат дека наставните содржини не овозможуваат разбирање на разновидноста на сексуалните врски и односи и на различните односи во семејството и меѓу пријателите. Тие заклучуваат дека учениците не се стекнуваат со вештини како да препознаваат принудни и доброволни врски и односи. Х.Е.Р.А. оваа година одбележува 10 години работа во унапредувањето на сексуалното и репродуктивното здравје. Главните достигнувања на Асоцијацијата се: бесплатни услуги за сексуално здравје и репродуктивно здравје во Младинските пријателски клиники „Сакам да знам“ и во Советувалиштето за ХИВ/СИДА при инфективната клиника, потоа бесплатното советување и тестирање за ХИВ/СИДА со мобилна единица низ целата земја, како и неформалното сексуално образование преку националната мрежа на млади едукатори./крај/ко