„Женските организации во Македонија го промовираат патријархатот што е основа на општеството во кое живееме,“ истакна Кочо Андоновски, активист за човекови права, на вчерашната панел дискусија на тема „Род и милитаризам“.

„Женските организации во Македонија го промовираат патријархатот што е основа на општеството во кое живееме,“ истакна Кочо Андоновски, активист за човекови права, на вчерашната панел дискусија на тема „Род и милитаризам“. „Поддржувачките на диктатурите во Латинска Америка ме потсетуваат на женските движења на Македонија, бидејќи кај нас се случува една интернализирана промоција на вредностите на патријархатот,“ додаде тој. Катерина Партинова од ХОПС, Струмица и Скопје, која повеќе од шест години работи со сексуални работници ги истакна репресивните мерки и политиката која се води против луѓето кои се „општествено неприфатливи“. „Целата ситуација со дискриминацијата и стигмата врз сексуалните работници од страна на средината како и институциите предизвикува цела една социјална група да биде принудена да опстојува на маргините на општеството, надвор од било каков систем за поддршка и заштита и со тоа е принудена да развива различни модели за опстанок,“ додаде таа. Според Славчо Димитров од Коалицијата за промоција и заштита на сексуалните и здравствените права во се уште актуелниот филм на Манчевски, „Пред Дождот“ е претставено „едно посебно силно изразување на насилството кое со себе го носи етноексклузивизмот и национализмот.“ „Сигурно се сеќавате на филмот и до каде резултира насилството на затворениот национален идентитет на интеретнички и интернационален конфликт. Тука гледаме како се спроведува насилство внатре во самата група со цел да се исчисти и да се одржи невозможната хомогеност на нацијата, со насилството кое се врши врз Замира (Лабина Митевска), која е типично родово неконфорен лик во тој силен етноцентричен контекст,“ истакна Димитров. Работилницата која се одржа на тема „Род и милитаризам“ како дел од „Денови на акција против дискриминацијата и милитаризмот“ имаше за цел да ги истражи врските помеѓу родните идентитети и милитаризмот. Се разговараше за родовите и очекувањата од нив во општеството како и за врските помеѓу строгата родова поделеност и милитаризацијата на односите во општеството внатре./крај/ко