Македонија
Вељаноски го отвори македонскиот штанд на Шангај Експо 2010
Македонската висока делегација присуствуваше утрово на отворањето на македонскиот штанд во „Шангај Експо 2010“
Македонска висока делегација присуствуваше утрово на отворањето на македонскиот штанд во „Шангај Експо 2010“. Претседателот на собранието, Трајко Вељаноски го посети изложбениот простор на Експо 2010 и свечено го отвори павиљонот на Република Македонија. На отворањето присуствуваа националниот комесар на Република Македонија за Шангај Експо, заменик министер за економија Методија Хаџи Васков и членовите на парламентарната група за македонско – кинеска соработка, Силвана Бонева, Цветанка Иванова и Џеват Адеми. Националниот комесар, Хаџи Васков, на членовите на делегацијата им го претстави просторот во македонскиот павиљон, дизајниран во форма на пчелино саќе испреплетено со мотиви од урбани средини и пејзажи од Република Македонија, што во целост се вклопува со мотото на Експо 2010 “Подобар град, подобар живот”. Вељаноски во Шангај се сретна со потпретседателот на НР Кина, Ши Џинпинг. На средбата присуствуваа и останатите членови на собраниската делегација Силвана Бонева, Цветанка Иванова и Џеват Адеми. Потпретседателот Ши Џинпинг искажал задоволство од постигнатото високо ниво на вкупните односи меѓу двете земји, што ги карактеризира висок степен на пријателство и меѓусебно разбирање. “Убеден сум дека соработката меѓу нашите две земји на различни полиња уште повеќе ќе се продлабочува и ние сме подготвени да ги засилиме нашите активности. При тоа се надевам дека ваквите добри односи на сите останати полиња ќе придонесат за интензивирање особено на економската соработка”, истакна претседателот Вељаноски. Потпретседателот на Кина Ши Џинпинг истакна дека учеството на Република Македонија на Шангај Експо 2010 ја покажува почитта кон Кина како домаќин на овој извонредно голем и значаен настан. “Се надевам дека вашиот павиљон ќе постигне целосен успех и ќе ги покаже шармот и убавините на РМ пред светската јавност”, рече Ши./крај/фо/мп
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Поради јазични бариери одложено продолжението на конститутивната седница на работната група за реформи во изборното законодавство, кажа Филков
Поради технички причини денешната конститутивна седница на работната група за реформи во изборното законодавство беше одложена за следната недела. Министерот за правда Игор Филков изјави дека членовите на работната група не се впуштиле во материјална расправа затоа што прво треба да се утврди дневниот ред.
,,Иако денес требаше да биде одржана првата конститутивна седница на работната група за реформи во изборно законодавство на која требаше да се избере претседател, како и да се донесе предлог-деловник за утврдување на методологијата и динамиката на работење, сепак тоа не се случи поради одредени јазични бариери. Од дел од присутните претставници на политичките партии беше побарано материјалите да бидат преведени за полесно да можат да се разберат’’, рече Филков.
Филков се надева дека следната недела членовите ќе се усогласат за термин , ќе се избере претседател на работната група и ќе се отпочне со работа каде што сите ќе имаат можност да ги дадат своите предлози и сугестии за реформите во изборното законодавство.
Македонија
Сиљановска-Давкова-Грлиќ Радман: потврдена подготвеноста на Хрватска да придонесе кон забрзување на македонскиот евроинтеграциски процес
Претседателката Гордана Сиљановска-Давкова денеска го прими Гордан Грлиќ Радман, министер за надворешни и европски работи на Република Хрватска, кој престојува во официјална посета на земјава.
Обајцата го потврдија цврстото македонско-хрватско пријателство коешто двете земји го негуваат повеќе од 3 децении, втемелено на взаемна почит и разбирање и реализирано низ политички дијалог и конструктивна соработка.
Претседателката искажа искрена благодарност за хрватското отворено и континуирано разбирање и поддршка на македонската интеграција, како и на принципиелниот став на Хрватска дека проширувањето на Унијата со Западен Балкан треба да се темели на реални заслуги, без билатерализација и вето.
Министерот Радман ја потврди подготвеноста на неговата држава да придонесе кон забрзување на македонскиот евроинтеграциски процес во рамките на Копенхашките критериуми, потенцирајќи дека македонската држава доби статус на кандидат за членство во ЕУ во март 2005 година, односно неколку месеци пред Хрватска.
Соговорниците очекуваат дека партнерството дополнително ќе се зајакне со Договорот за стратешка соработка со Владата на Република Хрватска, како и со претстојната официјална посета на Претседателката Сиљановска-Давкова на пријателска Хрватска, кон крајот на март.
Македонија
Уапсен тетовец: осомничен за лажни дојави за поставени бомби во образовни институции
Утрово во 09:10 часот во с.Палатица, тетовско, полициски службеници од одделот за сузбивање на организиран и сериозен криминал при Министерството за внатрешни работи во координација со полициски службеници од СВР Тетово го лишиле од слобода М.Р.(18) од село Палатица.
Тој се сомничи дека во повеќе наврати испраќал електронски пораки на повеќе образовни институции во Тетово дека во институциите има поставено експлозивни направи.
Полицијата соопшти дека по преземени мерки и извршени проверки е констатирано дека сите дојави за поставени бомби биле лажни.
Денеска, со сдуска наредба, бил извршен и претрес во неговиот дом во селото, при што биле одземени повеќе електронски уреди.
Лицето било приведено во полициска станица и по целосно расчистување и документирање на случаите, во координација со јавен обвинител против него ќе биде поднесена соодветна пријава.

