Времето почнува да се стеснува и за жал мислам дека како тоа ќе одминува, се помалку ќе можеме да бидеме оптимисти

Времето почнува да се стеснува и за жал мислам дека како тоа ќе одминува, се помалку ќе можеме да бидеме оптимисти.

Ова го изјави францускиот амбасадор Жан Клод Шлумберже во неделното интервју за Радио Слободна Европа, коментирајќи ја оптимистичката изјава на шефот на шпанската дипломатија Мигел Анхел Моратинос за можно решавање на спорот за името до јуни.

Шлумберже смета дека тој оптимизам бил заснован врз постоењето волја да се стигне до решение како од македонска така и од грчка страна.

Ништо не е невозможно доколку постои политичка воља, вели тој.

„Мислам дека е неопходно да се продолжат преговорите под покровителство на ОН со медијаторство на  Нимиц. Имено, важно е да има билатерални разговори на сите нивоа меѓу двете земји, вклучително и највисокото ниво. Тоа би овозможило да се создаде подобра клима на доверба и овозможува исто така сигурно да се оди кон решение. Ќе повторам, времето е кратко, но сепак не е доцна за европскиот Совет во јуни, под услов да постои силна волја“, смета Шлумберже.

Од почетокот на годината, ние од меѓународната заедница имавме неколку мотиви за незадоволство, вели Шлумберже.

Во доменот на реформите, на пример, ни се чини дека има некои закони кои беа усвоени а не соодветствуваат со европските стандарди. Тука пред се мислам на законот за водите и законот за антидискриминација, рече Шлумберже.

Што се однесува на политичкиот дијалог и тука гледаме дека постојат потешкотии што мошне добро се гледаат во Собранието. Истото се гледа и кога зборуваме за вклучување и дијалог со надворешни организации, организации на општеството. Сето тоа ни се чини непријатно и би жалеле доколку тоа има негативни последици врз идниот извештај на Европската Комисија, вели францускиот амбасадор.

И што се однесува на Охридскиот договор и неговата имплементација, и тука мислиме дека атмосферата не е најдобра. Постојат меѓуетнички тензии кои се анимирани од полемики, теми кои се деликатни, слушнавме повици за насилни опции, и сето тоа не е добро. Треба да бидеме претпазливи и сите да покажат силен дух на одговорност, изјави францускиот амбасадор Жан Клод Шлумберже во неделното интервју за Радио Слободна Европа.  /крај/рсе/мп