Треба да се димензионира јавната администрација и да се спроведат реформи, за да почне да се гради демократска и професионална администрација во функција на граѓаните, е заклучокот од денешната дебата на тема „Партиско – политичко влијание во државната и јавната администрација“.

Треба да се димензионира јавната администрација и да се спроведат реформи, за да почне да се гради демократска и професионална администрација во функција на граѓаните, е заклучокот од денешната дебата на тема „Партиско – политичко влијание во државната и јавната администрација“.

Учесниците на дебатата во организација на Државната комисија за спречување на корупцијата се согласија дека треба да се создаде администрација која ќе влијае на политиката, а не политиката да влијае на администрацијата.

Претседателот на Антикорупциска комисија Илми Селами рече дека администрацијата може да се контролира не само со правната регулатива, туку и со контрола на спроведувањето на донесените закони.

„Целта е политичарите да не бидат сопственици на работните места во јавната администрација, туку сопственици да бидат способните кадри. Во Македонија, говорат извештаите кои доаѓаат од ЕК, јавната администрација во значителен дел е политизирана и партизирана“, изјави Селами.

Тој рече дека државата ќе мора да се потруди да го намали интензитетот на партизација на администрацијата, затоа што,  тоа е, како што рече, од голема штета.

Министерот за правда Михајло Маневски рече дека во Македонија треба да се создаде стручна, компетентна и одговорна администрација.

„Согласно препораките на ЕУ за јакнење на капацитетите на јавната администрација, минатата година се донесени измените и дополнувањата на Законот за државни службеници, како и Законот за јавните службеници, кој треба да почне да се применува од 2011 година. Подготвен е и етичкиот кодекс за јавните службеници“, изјави Маневски.

Деканот на Правниот факултет, Борче Давитковски рече дека крајно време е македонската јавна администрација да се ослободи од придавките „партизирана“ и „политизирана“.

Според него во практикувањето на Законот за државни службеници од 2000 година, по изборите во 2002 и 2006 година е направен цунами, во првиот слој на раководните државни службеници.

Тој рече дека тоа е македонски рецепт за тоа како не треба да се спроведува еден закон, кој како што рече,  може да се патентира.

Давитковски предложи шест месеци пред и по избори да не може да се врши унапредување или уназадување во државната и јавната администрација за да се прекине практиката и да се стави законска брана, особено во државната администрација во Македонија.

Во Македонија е неопходно да се формира академија за државни службеници во која тие постојано ќе се обучуваат, рече Деканот на Правниот факултет, Борче Давитковски на денешната дебата на тема „Партиско – политичко влијание во државната и јавната администрација“. /крај/бд