Можна е мини реконструкција во Владата на премиерот Никола Груевски уште во август, пишува неделникот „Форум“ во својот најнов број.

Можна е мини реконструкција во Владата на премиерот Никола Груевски уште во август, пишува неделникот „Форум“ во својот најнов број.

Информациите до кои доаѓа „Форум“, а кои владејачката ВМРО-ДПМНЕ ги демантира, говорат за тоа дека овој пат ќе бидат реконструирани министерот за образование Никола Тодоров, за правосудство Михајло Маневски и за внатрешни работи Гордана Јанкулоска.

Неделникот констатира дека најмногу забелешки и аргументи зошто треба да замине од министерската фотеља одат на конто на министерот Маневски, пред сè поради бројните афери со кои се поврзува неговото име, како случајот „и плата и пензија“, но и шпекулациите дека тој стои зад разрешувањето на судијката Виолета Дума.

Како негов наследник на функцијата министер за правда се спомнува актуелната министерка за внатрешни работи Гордана Јанкулоска, во која премиерот Груевски има огромна доверба.

„Форум“ открива дека на нејзино место би дошол началникот на СВР Штип Ѕвонко Каширски, професионалец кој и претходно бил на високи позиции во МВР.

Груевски, во рамки на мини реконструкцијата, планира да го замени и министерот за образование и наука Никола Тодоров, кому му се забележува за слабите резултати во работењето.

Не е познато кој би можел да биде негов наследник, иако имаше некои шпекулации дека тоа би можел да биде поранешниот студентски лидер Самуил Малчевски, што за познавачите на состојбите во партијата на власт се чини малку веројатна и несериозна варијанта, заклучува „Форум“ во најновото издание. /крај/форум/ст