Власта и опозицијата со меѓусебни обвинувања доколку евентуално, Македонија во вторник добие негативна оценка од Советот за стабилизација и асоцијација.

Власта и опозицијата со меѓусебни обвинувања доколку евентуално, Македонија во вторник добие негативна оценка од Советот за стабилизација и асоцијација. Според СДСМ, власта ги крие слабостите под закрила на нерешениот спор, за што владејачкото мнозинство негира. „Има една реченица што доаѓа од Брисел, а тоа е дека власта сака под закрила на нерешениот спор сака да ги прикрие сите свои слабости од Законот за енергетика, притисок во судството, партизација на администрација, па се до Законот за антидискриминација. Има серија на проблеми кои се директно генерирани од страна на власта“, изјави Јани Макрадули од СДСМ.     Илија Димовски од СДСМ демантира и вели дека се што е направено, а според него е многу, ќе биде констатирано во извештајот на ЕК. „Oваа Влада според сите проценки на меѓународните владини институции се занимава со подобрување на борбата против корупцијата и според сите светски скали бележи напредок така што паѓаат сите забелешки на опозицијата која свесно сака да предизвика Македонија да добие негативен извештај. Само на тој начин опозицијата ќе си ги оправда сите свои деструктивни дејанија во последните неколку месеци“, изјави Димовски. Претходно првиот парламентарец Трајко Вељаноски изјави дека одговорноста за евентуалниот негативен извештај што би можел да произлезе од денешниот состанок на Советот за стабилизација и асоцијација што се одржува со Брисел ќе ја сноси и тој и власта и опозицијата. Од СДСМ велат дека Вељановски не може да најде оправдување. „Што и да стори Вељаноски не може да најде оправдување за лошиот сигнал што го испрати во саботата кога го стави на пленарна седница Деловникот без консензус и без присуство на опозицијата. Ниското ниво на политичка комуникација на пратениците на ВМРО-ДПМНЕ, кое свесно го дозволи Вељаноски на седницата, обвинувања и споредби со Караџаферис и радикалниот Лаос, воопшто не одат во прилог на градење на вистински политички дијалог“, рече Макрадули. Според Макрадули, СДСМ во изминатиот период покажала и сериозна волја и сигнали за вистински политички дијалог во интерес на европските интеграции на Македонија. За тоа дали ќе се вратат на координација за формирање тело за контролирање на трошењата на народните пари и да го изгласаат Деловникот, Макрадули вели дека има сеуште шанси да се закаже посебна седница, на која ќе се стави точката за формирање работно тело за контрола на трошењето на народните парите. „ВМРО-ДПМНЕ и Вељаноски имаат се уште шанси да закажат посебна седница, на која ќе се стави точката за формирање работно тело за контрола на трошењето на парите без разлика што „на трик и со десантски методи е изменет Деловникот после последните усогласувања на Комисијата за мандатно-имунитетни и деловнички прашања“, рече Макрадули.     Опозицијата како што рече тој ќе го изгласа Деловникот по формирањето на вакво тело. ВМРО-ДПМНЕ обвини дека опозицијата свесно избегала од седницата во саботата и од координациите за Македонија да добие негативен извештај. „Еден од клучните приоритети за да добиеме позитивен извештај беше изгласувањето на измените на Деловникот со консензус. Ние го акцептиравме барањето на ЕУ да биде донесен Деловник со консензус. Организиравме долги дебати, ги прифативме сите барања на опозицијата и ги вградивме во Деловникот за кој што се усогласивме. Недоаѓањето на опозицијата на таа седница е нивна одлука Македонија да добие негативен извештај“, изјави Димовски. /крај/бд