Новоименуваниот амбасадор на Македонија во НАТО, Мартин Треневски рече дека ќе се залага за промена на заклучокот на самитот на алијансата во Букурешт, со цел воспоставување на покоректен однос кон Македонија како земја кандидат и нејзино зачленување во Алијансата.

Новоименуваниот амбасадор на Македонија во НАТО, Мартин Треневски рече дека ќе се залага за промена на заклучокот на самитот на алијансата во Букурешт, со цел воспоставување на покоректен однос кон Македонија како земја кандидат и нејзино зачленување во Алијансата. При претставувањето на својата платформа пред членовите на собраниската Комисија за надворешна политика, Треневски условот за надминување на спорот со името го нарече „чиновничко размислување“, за кое ќе се залагал да се надмине. „Ќе настојувам и лично, и ние како мисија, пред сè во контактите со амбасадорите на земјите-членки на Алијансата, да она што е заклучок од завршното коминике од самитот во Букурешт да се корегира и да се воспостави еден многу покоректен однос кон нас како земја кандидат, која што давала, дава и ќе дава придонес во рамките на своите можности и потенцијали за целите и идеалите на Алијансата.“, рече Треневски. Амбасадорот Треневски смета дека недозволиво е, под изговор за солидарност, да се врши, како што рече, политичка и економска агресија врз Македонија. „Ако горат шумите околу Атина, или има не дај боже, елементарна непогода, ние сме први соседи, ќе пристапиме да помогнеме. Меѓутоа, солидарност со нешто што со политички речник може многу слободно да се дефинира како политичка и економска агресија на земја-членка на Алијансата врз земја-кандидат за членство, мислам дека ниту една демократија не би можела да се согласи со такво нешто. Нема тука солидарност“, рече Треневски. Ваквите ставови на Треневски од опозицијата ги оценија како катастрофален пристап на новоименуваниот амбасадор. Игор Ивановски од СДСМ рече дека е недозволиво Треневски да се користи со, како што рече, дипломатски недозволена реторика. „Многу е опасно јавно да истакнувате и да се гордеете со тоа дека вие сте се спротивставувале на принципите на НАТО и сакате дополнително да го правите тоа сега од позиција на формален амбасадор на Република Македонија во НАТО. Фалеше уште да ни ја кажевте методологијата како ќе го правите тоа“, вели Ивановски. Според него, Треневски отишол и чекор понатаму од, како што рече, проблематичните ставови на владата. „Не можам да разберам на кој начин вие застапувате став дека Македонија треба да работи на корегирање на заклучокот на самитот на НАТО во Букурешт во 2008-ма година. Господине Треневски, тоа е завршена работа. Заклучок на еден самит е заклучок на тој самит. Што ќе се случува на следниот, тоа е друга работа“, рече Ивановски. Членот на Комисијата, пратеникот Влатко Ѓорчев од ВМРО-ДПМНЕ не гледа ништо спорно во ставовите на Треневски. Рече дека тој е адекватно решение за амбасадорското место во седиштето на НАТО. „Очигледно е, јасно е, сите гледаме, сите чуствуваме дека грчката политика води политика на анимозитет и антагонизам спрема Република Македонија. Политика што е непринципиелна, политика што не е во функција на добрососедските односи“, рече Ѓорчев. Павле Трајанов од Демократскиот сојуз, од своја страна, побара да се изгради национален консензус во однос на спорот со името. Смета дека не постои друга опција за зачленување во Алијансата без решение на проблемот со Грција. “Мислам дека многу не треба да бидеме оптимисти дека отворените прашања што ги има Република Македонија, посебно спорот наметнат од страна на Република Грција за нашето име, дека тој спор може да се надмине со некаков друг консензус или некои други ставови од страна на влијателните членки на НАТО“, рече Трајанов. Треневски, кој на амбасадорската функција ќе го наследи Кире Илиевски, рече дека неговото именување доаѓа во многу специфичен момент и за Македонија и за Алијансата. Тој рече дека ќе работи на добивањето покана за членство на ноемврискиот самит на НАТО во Лисабон. /крај/ач