Здружението на раселените лица од Арачиново „Зора“ упати порака до меѓународната јавност, властите и граѓаните на Македонија, потсетувајќи на нереализираниот дел од Рамковниот договор и состојбата со внатрешно раселените лица.

Здружението на раселените лица од Арачиново „Зора“ упати порака до меѓународната јавност, властите и граѓаните на  Македонија,  потсетувајќи на нереализираниот дел од Рамковниот договор и состојбата со внатрешно раселените лица.

Тие бараат забрзување на судските постапки пред сите судови, РСС и сите надлежни институции, со цел да им се реши статусот и да бидат соодветно обештетени за загубениот имот.

Потсетуваат дека сè уште постојат 766 внатрешно раселени лица , Македонци, Срби и Роми, сместени во колективните центри  „Сениќ“ , „Партенија Зографски, „Ранка Милановиќ“, „Здравко Цветковски“ и „Стив Наумов“.

Велат дека единствена неимплементирана точка е точката во која индиректно се третираат раселените Македонци,  протерани во кризата во 2001 година.

„Бидејќи судската власт не ги почитува законите и донесува незаконски пресуди (само за раселените), бидејќи нашиот спор е на пат да се решава пред судот за човекови права во Стразбург , соопштуваме дека досудените средства како милосрдие, повеќето од раселените нема да ги подигаат. Бараме државата да ги прекине сите грижи за раселените  за да не ни ги наплаќа со кинење на законската камата и на нематеријалниот дел . Ние од 2003 година бараме забрзување на судската постапка пред сите судови , РСС и сите надлежни институции“, се наведува во соопштението на „Зора““.

Посочуваат дека  во недостаток на слух за решавање на проблемите во институциите на државата  осма година водат маратонска судска постапка и оти 15 – те  предмети на внатрешно раселените лица од Арачиново и понатаму се во ќорсокак .

Информираат дека по задржување на предметите по повеќе месеци во писарницата на Основниот Суд , дефинитивно сите 15 предмети излегоа од Основниот и се во процедура пред Апелациониот суд.

„Наспроти донесените мизерни пресуди (во просек по 20 000 евра по семејство), куќите на Македонците во Арачиново или се продадени за никакви пари или  се опожарени  или се доразрушени. Имотите на раселените се узурпирани, а бројот на починатите ја достигна бројката од 55, од кои две убиства во Арачиново и едно самоубиство“, се наведува во соопштението на „Зора“.

Прашуваат дали на раселените лица не им се решава судскиот спор само за да се држат како заложници во колективните центри или намерата е по природен пат, со смрт на раселените, проблемот да се реши сам по себе.

„Она што раселените  го изгубија од материјален аспект, се наоѓа во Арачиново , она што го изгубија од нематеријален аспект ги носат со себе десетта година, или го однесоа напуштајќи го овој свет. По речиси една деценија ако ги посетите поранешните кризни региони капитулацијата ќе ви биде сосема јасна(да не се лажеме) – етничкото чистење наречено ’соживот’ е имплементирано пред Рамковниот договор“, велат од „Зора“.

Утре се навршуваат девет години од потпишувањето на Охридскиот рамковен договор со кој се стави крај на воениот конфликтот во 2001 година и се постави рамка за меѓуетнички соживот./крај/бд