Редовната понеделничка координација кај претседателот на Собранието, Трајко Вељановски, прва по годишните одмори и денеска се одржа без присуство на пратениците од опозицијата.

Редовната понеделничка координација кај претседателот на Собранието, Трајко Вељановски, прва по годишните одмори и денеска се одржа без присуство на пратениците од опозицијата. Од опозициската СДСМ велат дека нивното отсуство се должи на фактот што нема помрднување во однос на нивните барања. Велат дека остануваат на ставот за формирање на собраниска комисија што ќе ги разгледува ревизорските извештаи и ќе го контролира трошењето на јавните средства. „Причините заради кои што ги напуштивме редовните координации се познати на јавноста. Досега од страна на претседателот нема направено никаков чекор за да отпочнат разговори за надминување на проблемите што доведоа до напуштање на координацијата од страна на СДСМ и на опозицијата во целост“, изјави Цветанка Иванова од СДСМ. Дел од членовите на опозицијата сметаат ова не води кон подобрување на политичкиот дијалог во земјата и формирањето на добра слика за Македонија пред европските институции, во контекст на есенскиот извештај на Европската комисија за напредокот на Македонија. „Не можам да речам дека за две недели со оладени глави или со подготвеност имаме кревање на нивото на толеранција и постигање на потребното ниво на политички дијалог. Мислам дека сме многу далеку од вистинскиот политички дијалог“, изјави Флора Кадриу од Нова Демократија. „Република Македонија во наредниот период ја очекува еден навистина голем предизвик, особено во пресрет на извештајот што треба да го добиеме од Европската Комисија, и особено самитот на НАТО што треба да се одржи на почетокот на ноември“, вели Горан Мисовски од НСДП. Од владејачката ВМРО-ДПМНЕ денеска изразија волја за разговор за сите спорни прашања. „ За да се договорат сите работи, треба да се седне да се разговара. Затоа, искрено очекував колегите да дојдат во 10:00 часот на координација. Бидејќи не пристигнаа, нормално дека и во текот на денот, и во наредните денови интензивно ќе разговараме за да можеме што побргу да седнеме заеднички и да ги расчистиме сите прашања кои што сметаат дека се отворени, бидејќи 30-ти септември е крајниот рок кога се затвара досието за Македонија. Мислам дека сите политички партии треба да го имаме тоа во вид ако и сакаме добро на нашата земја.“, изјави Силвана Бонева од ВМРО-ДПМНЕ. „Мислам дека нашите политичари се свесни дека се одговорни и би ги повикал оние што немаат некоја голема одговорност, да сносат одговорност кон овие процеси за иднината на државата. Би требало сите со заеднички сили Македонија да ја носиме напред, како што е и потребата на граѓаните“, вели Сафет Незири од ДУИ. Пратениците од опозицијата веќе подолго време не учествуваат на редовните координации кај првиот парламентарец Вељановски, поради несогласувањето во однос на изнаоѓањето на парламентарен механизам за контрола на трошењето на буџетските средства. /крај/ач