Пасивност и нестручност на дел од вработените во центрите за социјални работи – ова е оценката на Хелсиншкиот комитет по серијата случаи на сексуална злоупотреба на деца.

Пасивност и нестручност на дел од вработените во центрите за социјални работи – ова е оценката на Хелсиншкиот комитет по серијата случаи на сексуална злоупотреба на деца.

Од Хелсиншки сметаат дека надлежните само констатираат одредена повреда, без притоа самоиницијативно да поведат постапка или да делуваат превентивно таму каде што имало услови за тоа. Бараат од министерството за труд и социјална политика во центрите да спроведе суштинска персонална и организациска реформа.

„Обуката треба да промовира и обезбедува континуирано учење и надградување на персоналот, потребни за изградба и одржување на ефективни услуги и организациска структура. Реформата мора да биде проследена со развивање прецизни контролни механизми и процедури кои ќе обезбедат идентификување и санкционирање на прекршувањата на правата на детето“, се вели во соопштението.

Недостасува и меѓусебна комуникација и соработка меѓу институциите, забележуваат од Хелсиншки. Предлагаат да се работи на нивно поврзување и взаемно информирање.

Во соопштението уште еднаш се потсетува дека Македонија се уште не ја ратификувала Конвенцијата на Советот на Европа за заштита на децата од сексуална експлоатација и злоупотреба. Превентивните мерки наведени во Конвенцијата вклучуваат проверка, регрутирање и постојана обука на луѓето кои работат во контакт со деца, континуирано информирање на децата со што тие стануваат свесни за ризиците и учат како да се заштитат себеси, како и следење на мерките за прекршителите и потенцијалните прекршители.

Статистиката покажува дека во првите шест месеци од 2010 година за 18 проценти е намален бројот на сексуални деликти извршени над малолетници, споредено со истиот период лани. Досега регистрирани се 41 кривично дело, а пријавени се вкупно 48 лица. Според видот, најзастапено е делото – полов напад врз малолетник кој не наполнил 14 години./крај/со/бч