Министерот за внатрешни работи Панче Тошковски денеска присуствуваше на интерактивната куклена претстава што се одржа во Дом на култура „Билјана Белочанец“ во општина Кисела Вода, во организација на Републички совет за безбедност на сообраќајот на патиштата и Театар Провокација, како дел од кампањата „Да ги заштитиме децата во сообраќајот“.

Тошковски потенцираше дека едукацијата на најмладите претставува еден од најважните сегменти во градењето сообраќајна култура и во заштитата на човечките животи.

„Безбедноста на децата е наш врвен приоритет. Преку вакви активности, кои на децата им се блиски и разбирливи, создаваме генерации што ќе ги почитуваат сообраќајните правила и ќе придонесуваат за побезбедни патишта. Министерството за внатрешни работи ќе продолжи активно да ги поддржува и да учествува во сите проекти насочени кон подигнување на свеста за сообраќајната безбедност“, истакна Тошковски.

Министерството за внатрешни работи и во иднина ќе продолжи со активности и кампањи насочени кон едукација на децата и младите како една од најранливите категории учесници во сообраќајот, со цел создавање побезбедна сообраќајна средина за сите граѓани, најавуваат од таму.

Потпретседателот на Владата и министер за односи меѓу заедниците, Иван Стоилковиќ, денеска одржа работна средба со претставници на граѓански организации кои ги претставуваат различните етнички заедници во земјата.

Средбата била организирана на иницијатива на вицепремиерот и министер Стоилковиќ, со цел навремено информирање на претставниците на заедниците за програмските активности и планираните проекти на Министерството за односи меѓу заедниците во текот на оваа календарска година, како и за приоритетите во претстојниот период.

На средбата присуствуваа претставници на организации од турската, бошњачката, ромската, српската и влашката заедница, како и претставници на други граѓански организации кои делуваат во насока на унапредување на меѓуетничката соработка, еднаквите можности и општествената кохезија, и тоа: Ерхан Махмутовиќ и Џемиљ Кучевиќ од Јени Јол, Тахсин Ибрахим од АДЕКСАМ и Зехријан Салих од Асоцијација на турски новинари во Македонија од турската заедница; Изета Бабачиќ од Диванхана од бошњачката заедница; Ахмет Јашаревски од Центар за ромска заедница ДРОМ – Куманово, Надир Реџепи од ИНСОК и Сејнур Сефер од Ромски ресурсен центар претставници на ромската заедница; Василка Китановиќ од Српски културен центар, Гордана Јовиќ – Стојковска од Српска заедница во Македонија и Зоран Жугиќ од Заедница на Србите во Македонија и Битола како дел од српската заедница; Јана Михаилова и Марија Николова од Интегра нау и Горги Горгиев од Здружението на стопанственици Власи од Македонија Мандра од влашката заедница; Бесир Дерњани од Фондација Албиз – Скопје, Флорент Бајрами од Заеднички вредности и Пранвера Касами од Институт за лидерство и јавни политики – Тетово.

„Во текот на состанокот министерот Стоилковиќ ги презентираше програмата и стратешките цели на Министерството, при што беше отворена конструктивна дискусија за начинот на реализација на проектите, нивната ефикасност и навремена имплементација. Посебен акцент беше ставен на предизвиците со кои се соочуваат помалите заедници, како и на потребата од институционална поддршка и партнерски однос со граѓанскиот сектор“, се наведува во соопштението.

Министерот за здравство, Азир Алиу, се обрати на денешниот настан по повод унапредување на правото на здравје за лицата со попреченост, во организација на интерпартиската парламентарна група за правата на лицата со попреченост, што се одржа во Собранието.

– Министерството за здравство, заедно со Министерството за образование и наука и Министерството за социјална политика, демографија и млади врз основа на „Меморандум за соработка“ се вклучени во воспоставување семејно-ориентиран систем за рана интервенција во детството. Здравството е првата врата каде што доаѓаат семејствата, затоа институционална задача е да не се пропушти ниту едно дете кое има доцнење во развојот, попреченост или ризик – било да е кај педијатар, патронажна служба, логопед или други стручни лица, посочи Алиу.

Тој информираше дека е во тек обука на тимови во јавните здравствени установи во Скопје, а стручни лица од Здравствен дом Скопје и Центарот за рехабилитација на патологија на вербалната комуникација поминаа специјализирана обука и учествуваа на студиска посета и сега активно даваат семејно-ориентирани услуги за рана интервенција.

-Министерството за здравство развива услови за продолжување на давањето семејно-ориентирани услуги за РИД во пилот установите и ќе се заложи за нивно постепено имплементирање на територијата на целата држава. Работиме на развој на системот за универзален скрининг, кој ќе се воведе на национално ниво и ќе биде достапен за сите деца до шестгодишна возраст. Тоа значи дека секое дете ќе има можност за рана проценка, без разлика каде живее и кој е неговиот родител. Универзален скрининг значи еднаква шанса за сите деца, односно нема да се потпираме на случајност и на тоа дали родителот ќе успее да најде специјалист, туку системско, организирано следење на развојот, додава министерот Алиу.