Македонија
150 нови професионални војници стапија на должност во редовите на македонската армија

Денеска, во касарната „Илинден“ се организира свеченост за прием на 150 нови професионални војници во редовите на Армијата на Република Северна Македонија.
Оваа година во армијата беа примени вкупно 300 професионални војници, од речиси 1.900 кандидати, кои се пријавија на двата јавни огласа. Министерката за одбрана, Славјанка Петровска, на новопримените професионални војници им порача дека честа да се облече армиската униформа е голема и дека нивната цел, од која никогаш не треба да се откажуваат, е службата кон татковината.
„Голема е честа што ви е дадена да ја облечете армиската униформа, но уште поголема е обврската што ја добивате. Патот што денес го почнувате не е воопшто лесен, но е благороден. Подгответе се за предизвици, искушенија, пожртвуваност, но никогаш да не се откажете од вашата единствена цел да ѝ служите на Република Северна Македонија“, рече министерката на свеченоста.
Петровска истакна дека благодарение на посветеноста, професионалноста, но, пред сè, на љубовта кон татковината и личната пожртвуваност, денес Армијата е модерна, современа Армија, во која припадниците не прашуваат зошто и не бараат изговори, туку велат веднаш и дејствуваат.
„И во 2023 година беа забележани многу успеси на нашите армиски припадници, од учество во вежби, освојување медали, учество во мировни мисии, но и без колебање учество во спасувачки мисии. Да се биде војник, офицер или подофицер не е лесно и токму затоа ги избираме најдобрите“, истакна Петровска.
На конкурсот за прием на 150 професионални војници пријавени беа 1.144 кандидати, што се должи на зголемувањето на стандардот на армиските припадници, условите за работа и развојот на Армијата.
На свеченоста присуствуваа и началникот на Генералштабот на Армијата, генерал-потполковник Васко Ѓурчиновски и заменикот-министер за одбрана, Тирон Јајага.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Уште колку луѓе треба да настрадаат за Панче Тошковски да почувствува одговорност, прашуваат од СДСМ

Министерот Панче Тошковски без око да му трепне јавно соопшти дека не чувствува никаква одговороност за колапсот на безбедносниот систем и фактот што на улиците се пука како да сме Див Запад, велат од СДСМ.
Според нив, последиците од партизацијата на полицијата и претоварењето во партиски сервис на ДПМНЕ скапо ги чини граѓаните.
„До кога мисли Тошковски да се криe зад политички реторики додека улиците стануваат небезбедни за граѓаните?
Не е само последното пукање во Куманово, непрекинатиот раст на вооружените и насилни инциденти во различни градови е сигнал за целосно системско потфрлање на безбедниот апарат, нема ниту превенција ниту соодветна реакција.
За тоа мора да има одговорност“, додаваат од оваа партија.
Македонија
Парични казни за три градинки и едно училиште по спроведени инспекциски контроли во кујните

Инспекциските служби на Агенција за храна и ветеринарство (АХВ), во септември годинава спроведоа инспекциски контроли во училишните и кујните во градинките на територијата на цела држава. Спроведени беа 91 контрола во градинки и 23 вонредни надзори во училишта.
За утврдените недоследности, издадени се 9 решенија со наредби за нивно отстранување. Во две градинки, хигиената не била задоволителна во кујните, а една градинка немала спроведено задолжителен здравствен преглед на вработениот персонал во кујните. Парични казни изречени се за 3 градинки, и поради несоодветно чување, уништени се 24 килограми храна.
Од спроведените контроли во училиштата, незадоволителни услови констатирани се само во една училишна кујна. Отстапки во однос на добрата производствена и добра хигиенска пракса утврдени се во две кујни. Поради погрешно декларирање, уништени се 59 килограми храна.
Инспекциските служби на АХВ за утврдените недоследности со контролите во училишните кујни изрекле 1 парична казна и донеле 5 решенија со наредба за нивно отстранување.
Македонија
Муцунски на состанок на министрите за надворешни работи во рамки на Берлинскиот процес

Денеска и утре во Белфаст ќе се одржи состанок на министрите за надворешни работи во рамки на Берлинскиот процес, на кој ќе учествува министерот за надворешни работи и надворешна трговија, Тимчо Муцунски.
Министрите ќе дискутираат за прашања поврзани со европската безбедност, помирувањето, регионалната и европската интеграција, како и за справувањето со нелегалната миграција, во контекст на процесот на проширување на Европската унија.
На состанокот ќе учествуваат министрите за надворешни работи од земјите од Западен Балкан и земјите–членки на Европската унија вклучени во Берлинскиот процес.
На маргините од настанот, Муцунски ќе оствари и повеќе билатерални средби.