Од Министерство за одбрана информират дека вчера во раните утрински часови дваесет питомци и двајца офицери на Центарот за обука на питомците на Воената академија „Генерал Михаило Апостолски“ се пожалиле на мачнина проследена со повраќање.

„Најнапред тројца питомци се пожалиле на мачнина проследена со повраќање по што итно биле пренесени на Инфективната клиника при Клиничкиот центар ‘Мајка Тереза’, каде од страна на дежурниот доктор биле прегледани и двајца биле вратени назад во единица без конкретна дијагноза, а еден питомец е хоспитализиран и се очекува во текот на денешниот ден да биде вратен во единицата. Подоцна уште седумнаесет питомци и двајца офицери се пожалиле со истите симптоми по што сите биле однесени на Инфективната клиника, каде што биле третирани од страна на медицинскиот персонал и откако им била констатирана стабилна состојба, биле пуштени назад во единицата. По добиената информација од страна на Министерството, веднаш е побарано Воено-медицинскиот центар заедно со инспекторите од Центарот за јавно здравје и од Агенцијата за храна и ветерина да истражат на што се должи овој случај“, велат од Министерството.

Како што посочуваат, во текот на вчерашниот ден е направен вонреден хигиенски епидемиолошки надзор од страна на екипи од Центарот за јавно здравје, Институтот за јавно здравје, Државниот санитарен и здравствен инспекторат и од Агенцијата за храна во касарната „Гоце Делчев“, каде што се наоѓа Воената академија, и од страна на Воено-медицинскиот центар во касарната „Боро Менков“ во Куманово, каде што исто така 4 лица се пожалиле на стомачни тегоби, при што се земени контролни примероци за испитување.

„Целта на овие вонредни надзори е да се намалат или целосно да се отстранат сите ризици, кои може да се одразат врз здравјето на луѓето. По добиените резултати од испитувањата што ги очекуваме во текот на денешниот ден, ќе се преземат натамошни чекори во согласност со препораките на надлежните институции“, завршуваат од Министерството за одбрана.