Македонија
Фрчкоски: МВР – овозможувач на насилството на плоштадот

Министерството за внатрешни работи се јави во улога на овозможувач на насилството што се случи во саботата на плоштадот “Македонија“во Скопје, смета Љубомир Фрчкоски, кандидатот за претседател од СДСМ и НСДП
Кога младите архитекти протестираа против градење црква на плоштадот “Македонија“ во Скопје, во саботата, според Фрчкоски, МВР се јави во уога на поттикнувач на насилството, со тоа што не си ја вршеше својата улога.“Улогата на МВР, според законот, е да спречи насилство на лице место, каде се случува, а не да гледа филмчиња после случувањата, и да открива сторители, кои, патем, пред нивни очи тепаа жени и деца“, рече Љубомир Фрчкоски, на денешната прес-конференција.Според него, МВР е претворено во штрафче, инструмент на гола репресија врз населението и против граѓаните кои не се членови на владејачката партија. “Во внатрешноста, населението пишти под стегата на полицијата, која казнува беспоштедно се што се активирало за опозициско делување“, обвини Фрчкоски.Наместо да го осудат насилството и газењето на слободата на собирање , владејачката партија и лидерот, дури сега откриваат организатори, смета Фрчкоски. Според него, не е спорно кој е организатор, може да е кој било, но кога пред очите на полицајците се случува насилство, тие мора да го сопрат. На новинарско прашање, дали ќе повикаат на немешање на Македонската православна црква во градењето црква на плоштад, Фрчкоски вели дека дури и Црквата има право да организира протест, за или против и тоа нукој не смее да го оспори. Дури, смета Фрчкоски, протест или собирање народ, не мора да се пријави, но доколку дојде до насилство, полицијата ќе преземе мерки соодветни на тоа што се случува и тежината на пријавите ќе биде поинаква. Од друга страна, на истата прес конференција, беа поделени материјали од Фејсбук, каде Ивица Георѓиевски, актуелен пратеник на ВМРО-ДПМНЕ и поранешен директор на Агенцијата за млади и спорт повикува на плоштад во, 11 часот, во саботата, за поддршка на изградба на најголемиот храм на “Македонската православна црква“. Георѓиевски, како што може да се види од доставените материјали е член на Фејсбук групите, “Цело Ѓорче гласа за д-р Ѓорге Иванов-за претседател“, Љубомир Фрчкоски (буреконосач), “Сашо Димиќ, секогаш близок со народот, не гласаме за криминалецот Стевче Јакимовски“, “Стевче Јакимовски за во затвор“ и други.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Директорот на БЈБ: Безбедноста на ИКТ системите не е само техничко, туку стратешко и општествено прашање

Директор на Бирото за јавна безбедност при МВР, Александар Јанев учествуваше со свое излагање на 7. Западнобалкански дигитален самит кој се одржува во Скопје од кој Македонија испраќа силна порака за регионална соработка и заедничка дигитална иднина.
„Сајбер-нападите сè почесто ги таргетираат институциите, нарушуваат услуги и ја поткопуваат довербата во системот, па оттаму неопходно е постојано вложување во едукација, како на полициските службеници, така и на јавната администрација, со цел навремено препознавање и реагирање на сајбер-инциденти. Безбедноста на ИКТ системите не е само техничко, туку стратешко и општествено прашање, па во таа насока за надминувањето на предизвиците неопходна е регионална и меѓународна соработка, како и активно вклучување на приватниот сектор во развојот на иновативни решенија“, истакна директорот Јанев во своето излагање.
Јанев ги нагласи можностите и плановите за користење на вештачка интелигенција во полициското работење, со цел побрза и поефикасна обработка на податоци и навремено донесување одлуки.
„SOCTA 2025 потврдува дека сајбер-криминалот е во пораст и мора да остане висок безбедносен приоритет. Само преку координирана акција и споделена одговорност можеме да изградиме отпорен и безбеден јавен сектор“, потенцираше на крај директорот Јанев.
Македонија
Судскиот совет го разреши судијата Енвер Беџети, кој е на црната листа на САД

Судскиот совет го разреши судијата од Апелацискиот суд Скопје, Енвер Беџети, од функцијата. Инаку, тој во декември минатата година, заедно со поранешниот прв вицепремиер и министер за политички систем и односи меѓу заедниците, Артан Груби, беше ставен на црната листа на САД за примање мито и одолговлекување судски предмети поврзани со кривичното осудување на Сашо Мијалков, поранешниот директор на УБК.
Судскиот совет по спроведена постапка за утврдување на одговорност на судијата Енвер Беџети, на 26.05.2025 година донесе одлука за негово разрешување.
Беџети ја обжали одлуката, а Советот за одлучување по жалба при Врховниот суд на денешната седница донесе одлука со која го потврди решението на Судскиот совет од мај годинава.
Груби и Беџети лани беа ставени на црната листа на САД.
„Денешното назначување на Артан Груби и Енвер Беџети е доказ дека политичкото мешање во судството не може – и нема – да се толерира. Соединетите Американски Држави ќе продолжат да ги именуваат оние кои се вклучени во значителна корупција што ги поткопува демократските институции и ја нагризува јавната доверба. Никој не е над законот, а одговорноста е од суштинско значење за напредок“, рече тогаш американската амбасадорка, Ангела Агелер.
Македонија
Вработени во Општина Гази Баба организирале создавање и палење депонии, објави Арсовска

Општината Гази Баба и нејзиното јавно претпријатие се затекнати во незаконски активности кои директно ја загрозуваат животната средина и здравјето на граѓаните. Возила со општински ознаки, кои само пред една недела добија нови црвени таблици заради разграничување од комерцијалните, се затекнати во создавање диви депонии на подрачјето на Јурумлери, објави градоначалничката на Градот Скопје, Данела Арсовска.
Наместо да ја извршат својата законска обврска и да го исчистат просторот на Вардариште, додава таа, одговорните во општината самите организирале создавање на депонии.
Дополнително, вели Арсовска, дел од нив биле и запалени, со што е предизвикано сериозно загадување.
„Оваа практика претставува сериозен доказ дека дел од општинските структури активно учествуваат во создавањето и ширењето на диви депонии, а потоа свесно ги палат, со што предизвикуваат голема штета по животната средина и по квалитетот на воздухот. Потсетуваме дека ваквите активности се во директна спротивност со законските обврски на општините и претставуваат кривични дела за кои мора да следи соодветна одговорност“, вели Арсовска.
Таа ги повика сите надлежни органи веднаш да постапат согласно законските надлежности.