Македонија
ДУИ бара брз компромис за името и завршување на Охридскиот договор

Раководството на Демократската унија за интеграција (ДУИ) на денешното централно претседателство во седиштето тетовска Мала Речица ја анализирало работата на министрите и пратениците од нивните редови
Покрај работата на своите претставници, највисокото партиско тело на ДУИ во неделата ја разгледувало и динамиката на имплементацијата на Охридскиот рамковен договор, преговорите за името со Грција и други актуелни политички случувања во државава.Како што пренесуваат тетовските дописници, претседателот на ДУИ, Али Ахмети дал преодна оценка за работата на пратениците и министрите од неговата партија. Ахмети смета дека повеќето од задачите се министрите ги сработиле но секогаш може и подобро.„Политиката на ДУИ е секогаш да биде незадоволна од сработеното бидејќи секогаш може и подобро“, изјавил Али Ахмети.Лидерот на ДУИ оценил дека заговарањето нов договор меѓу Македонците и Албанците би претставувало бесцелно трошење време и енергија. Ахмети смета дека треба да се концентрира на имплементацијата на Охридскиот договор кој е поддржан од меѓународната заедница и посебно на законите кои произлегуваат од него, за што извори од неговата партија велат дека треба веќе поинтензивно да се заокружи. По едно од прашањата со кои ДУИ не се согласува со коалициониот партнер ВМРО-ДПМНЕ, Ахмети рекол дека компромис за името со Грција е потребен, бидејќи заради тоа, како што рекол, државата е во застој во однос на евроинтергациите. Ахмети додал дека нема готов предлог, а и дека нема да фаворизира некој од оние што беа споменува изминатиот период. „Не само спорот за името, туку и сите проблеми со кои ние како држава може да се соочиме, не се ексклузивна одговорност на ВМРО-ДПМНЕ и за нивно решавање треба да се залагаме сите институции во државата“, изјавил Ахмети.Всушност Ахмети ги повтори познатите ставовите на ДУИ со кои во преговорите со најголемата партија во владејачката коалиција ќе се обиде да притисне за добивање подобри позиции за нејзините министри.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
АВМУ ќе врши мониторинг на медиумското известување во предизборниот период

По распишување на Локалните избори, закажани за 19 октомври 2025 година, започнува мониторингот на Агенцијата за аудио и аудиовизуелни медиумски услуги врз радиодифузерите за начинот на известување во периодот пред започнување на изборната кампања и за почитувањето на одредбите од Изборниот законик што се применуваат со распишување на изборите.
До почетокот на изборната кампања, АВМУ ќе врши секојдневен мониторинг на девет телевизиски програмски сервиси на државно ниво, со најголем просечен дневен досег до публиката, додека сите останати програмски сервиси ќе се мониторираат врз основа на претставки.
„При известувањето за изборниот процес, радиодифузерите треба да ги почитуваат професионалните начела, посебно начелото за објективно, непристрасно прикажување на настаните, со еднаков третман на различните гледишта и мислења, така што ќе ѝ овозможат на публиката слободно да оформи свое мислење за одделни настани и прашања, како и да ги почитуваат посебните забрани за поттикнување омраза и нетрпеливост. Известувањето за редовните активности на државните органи, органите на општините и на градот Скопје, на државните институции и организации, како и за други правни лица со јавни овластувања, не смее да биде во функција на изборно медиумско претставување на ниту еден политички субјект“, соопшти АВМУ.
Јавниот радиодифузен сервис и телевизиите на државно ниво треба да обезбедат информирање за изборниот процес и за лицата со сетилна попреченост, а за содржините што ќе ги направат пристапни во текот на изборната кампања треба навреме да ја информираат Агенцијата.
Од распишување на изборите до почетокот на изборната кампања не е дозволено да се емитуваат реклами финансирани од Буџетот на државата, ниту платено политичко рекламирање, освен огласи за собирање потписи за поддршка на кандидатури на група избирачи. Исто така, не е дозволено уредници, новинари, водители на програма и презентери истовремено да бидат ангажирани во програмите на радиодифузерите и во предизборни активности на учесниците во изборна кампања. При објавување на резултати од испитувања на јавното мислење треба да се објават и сите неопходни податоци за конкретното истражување утврдени во Изборниот законик.
Радиодифузерите кои ќе емитуваат платено политичко рекламирање (ППР) треба да извршат регистрација во Државната изборна комисија најдоцна до 12 август, а ценовниците да ги достават до ДИК, ДЗР, ДКСК и АВМУ, најдоцна до 14 август 2025 година.
Како и досега, Агенцијата, на својата веб страница постави банер со материјали поврзани со изборниот процес – законски и подзаконски акти, образец за претставки и сл. Банерот е достапен на македонски, албански и на англиски јазик, и континуирано ќе се ажурира во текот на изборниот процес.
Македонија
На Табановце се чека по 40-тина минути за влез и излез од државата

Сообраќајот на државните патишта се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, на ГП Табановце времето на чекање за влез и излез од државата е околу 40 минути, на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Нуркач од Бугарија исчезна во Охридското Езеро

Нуркач од Бугарија исчезна во Охридското Езеро. Во тек е акција за негово пронаоѓање.
Според информациите на полицијата, денеска во 13.15 часот, во СВР Охрид и езерската полиција е пријавено дека И.Т.(52) од Република Бугарија, исчезнал при нуркање на длабочина од 89 метри во водите на Охридското Езеро, над селото Трпејца.
Од полицијата велат дека во акцијата за негово пронаоѓање се вклучени тимови од езерската полиција и Црвен крст со нуркачи од нуркачкиот клуб „Амфора“.