Во салата на Општина Струга, денеска среднoшколците дебатираа на јавна трибина на тема „Ограничувањето на слободата на изразување во средните училишта треба да биде дозволено“

Учесници на дебатата беа ученици од двете струшки средни училишта „Д. Ибрахим Темо” и „Нико Нестор”, кои се сместени во иста зграда и кои во домашната јавност се познати по нивните меѓуетнички закачки и тепачки. Средношколците беа поделени во два тима со мешан етнички состав, тим кој ја поддржува темата и тим кој не се согласува со истата. На дебата присуствуваа високи претставници на Мисијата на ОБСЕ во Скопје, на Министерството за образовение, на Општина Струга, на училиштата, претставници на медиумите итн. Во текот на дебатата, учениците разменуваа аргументи против и во полза на ограничувањата на слободата на говор. Така тие го поддржаа ограничувањето како еден од механизимите на спречување на говорот на омраза, одржување на образовната мисија и подобрување на реномето на училиштето. Од друга страна, негацискиот тим сметаше дека отворената дискусија е круцијална за решавање на проблемите и дека училиштето треба да ги воспитува и едуцира младите во дукот на демократските вредности. Дополнително тие сметаа дека правото да се ограничи слободата секогаш може да биде злоупотребено. Оваа дебата беше завршеток на проектот „Промоција на разбирање преку култура на дијалог“ кој во рамките на Дебатната програма, Младински oбразовен форум го спроведува во соработка со Мисијата на ОБСЕ во Скопје. Истиот работи на полето на промоција на меѓуетничка соработка. Проектот е наменет за учениците од струшките училишта „Др. Ибрахим Темо” и „Нико Нестор”. Истиот се имплементира како одговор на насилствата помеѓу учениците и нивните барања за поделба во јазични смени. Имено, МОФ и Мисијата на ОБСЕ во Скопје сметаат дека е потребно да се создат можности за комуникација и соработка помеѓу учениците од различна етничка припадност преку креирање интерактивни воннаставни содржини. Дополнително сметаме дека учениците треба да добијат простор каде отворено ќе дискутираат за прашања кои директно ги засегаат како група со заеднички интереси. Оттука, почнувајќи од мај 2008 г. МОФ во соработка со двете училишта успеа да организира 9 обуки за Јавна дебата и аргументирано говорење низ кои до денес поминаа 270 ученици од двете училишта со мешан етнички состав. Како резултат на обуките, учениците организираа 9 јавни дебати (на македонски, албански и турски јазик) во своите училишта на кои преку културна и организирана дебата се расправаше за суштествените проблеми на учениците кои се релевантни за образовниот процес, како на пр. задолжителното носење униформи, ефектот на видеокамерите во училиштата, демократијата во средношколското организирање итн. Проектот беше заокружен со напредна обука за интеркултурна комуникација и дебата по која следува дебатен турнир кој се одржа во просториите на училиштата на 6 јуни. Финалната дебата од турнирот каде дебатираа двата најдобри тимови беше отворена за јавноста и истата се одржа во просториите на Општина Стурга. Победи тимот составен од Мики Апостолски, Беџет Роци и Мавља Јахја. На овој начин 40-тина ученици ја заокружија учебната година со отворена дискусија преку соработка и тимска работа, наспроти конфликтите кои ја обележаа минатата година.