Македонија
Координативна средба за името

Претседателот Бранко Црвенковски и премиерот Никола Груевски денеска попладне ќе се сретнат во претседателскиот кабинет на координација на ставовите околу последниот предлог на медијаторот Метју Нимиц во спорот за името
На средбата најверојатно ќе бидат присутни и преговарачите Никола Димитров и Мартин Протуѓер. На неа, според плановите, државниот врв треба да излезе со решение и одговор на последниот пакет на Нимиц според кој се предлага широка меѓународна употреба на името Северна Македонија и се задира во националниот идентитет на Македонците. Иако двајцата највисоки државни функционери, и покрај претходните различни позиции, се изјаснија дека се неприфатливи последните решенија и предлози на Нимиц, сепак тие минатата недела не договорија одговор за медијаторот. Македонската страна тактизираше со оглед на тоа дека и официјална Атина не даде одговор, а Нимиц заминал на одмор. На средбата за два дена Црвенковски и Груевски ќе треба да одлучат дали предлогот целосно ќе се одбие или, пак, ќе се дадат крупни забелешки. Дипломатски извори тврдат дека и оваа координација може да биде неуспешна поради тоа што Груевски цврсто инсистира на двојната формула што би значело целосно одбивање на предлогот, додека пак Црвенковски би одел на крупни забелешки на предлогот “со цел македонската страна да покаже конструктивност“. Министерот Милошоски, вчера по повод празникот 23 Октомври, оптимист за успехот на денешната средба. „За последниот предлог на Нимиц ќе има координативна средба помеѓу Премиерот и Претседателот и тогаш ќе се изгради стави по однос на овие предлози“, најави Милошоски. Прашањето за името, освен од државниот врв, ќе биде разгледувана за прв пат и од страна на пратениците. После несогласувања и координации помеѓу партиите на власта и опозицијата, претседателот на Собранието Трајко Велјановски објави дека Резолуцијата за името поднесена од НСДП и СДСМ ќе биде последна точка на 27 седница која е во тек и дека за неа ќе се расправа во текот на наредната недела.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Онлајн закажување термин за сликање за лични документи и за македонската дијаспора, соопшти МВР

Министерството за внатрешни работи овозможи онлајн закажување термин за сликање за лични документи во државата и за македонската дијаспора, односно сите оние кои не поседуваат македонски телефонски број преку можност да извршат резервација преку електронската пошта, https://termin.mvr.gov.mk/Call_Request.
Од моментот на воведување на електронското закажување преку Веб страницата на МВР во текот на 2024 имало во просек по 7000 закажани термини месечно, а во текот на 2025 има над 4000 термини месечно или во просек речиси по 200 закажани термини на ден преку овој сервис.
МВР информира дека закажувањето термин преку редовните телефонски линии функционира беспрекорно и термин за редовна постапка се добива за еден ден.
Македонија
Ковачки од Берово: Во првата година од мандатот економијата заздравува

Наследивме една тешка социоекономска состојба во државата којашто беше резултат на катастрофалното владеење на СДС и на ДУИ. За среќа, резултатите на Владата на ВМРО-ДПМНЕ покажуваат дека уште во првата година од мандатот, економијата заздравува а ветувањата се оставруваат, истакна Драган Ковачки, пратеник на ВМРО-ДПМНЕ.
„Во првата година од мандатот го реализиравме предизборното ветување за 5.000 денари зголемување на пензиите на сите пензионери. Понатму, ветивме дека ќе го завршиме проектот со клиничката болница во Штип, нешто што е многу значајно за овој крај, за овие граѓани во селото Ратево, во селото Миташинци, воопшто за општината Берово каде што сме денеска во посета.
Заедно сме денеска со нашиот кандидат и иден градоначалник на општина Берово тоа е господинот Петар Ружински. Заедно да ги слушнеме проблемите на граѓаните, работите со коишто тие се соочуваат и имаат да ни ги предложат за да ги ставиме во нашата програма“, додаде тој.
Најави дека во наредниот период Владата предводена од ВМРО-ДПМНЕ и премиерот Христијан Мицкоски ќе бидат насочени на инфраструктурно градење на овој дел од државата којшто, според Ковачки беше заборавен од претходната власт.
„Верувам дека ВМРО-ДПМНЕ во наредниот период ќе има градоначалник од ВМРО-ДПМНЕ и тоа ќе биде господинот Петар Ружински за доброто на сите граѓани во Берово“.
Македонија
Данок за немажени и неженети е спротивен на Уставот, човековите права и даночната правда, општеството не се гради со казни, велат од ДОМ

Демократска обнова на Македонија (ДОМ) загрижена поради најавата на премиерот Христијан Мицкоски за можноста од воведување данок за немажени и неженети лица.
Ваквата најава, велат од партијата, претставува недозволив и опасен преседан кој директно ги повредува темелите на уставниот поредок, човековите слободи и начелата на еднаквост.
„Во Македонија, Уставот во член 9 гарантира дека сите граѓани и граѓанки се еднакви пред Уставот и законите, без оглед на нивниот личен статус. Воведување даночен товар врз основа на брачен статус е директна дискриминација и грубо кршење на ова уставно начело.
Дополнително, ваквата мерка е во спротивност со Европската конвенција за човекови права, конкретно член 8, кој ја гарантира правото на почитување на приватниот и семејниот живот, и член 14, кој забранува дискриминација при уживање на правата и слободите утврдени со Конвенцијата“.
Според ДОМ, во доменот на фискалната политика, предлогот е и против основните начела на даночната правда, односно на правичноста, неутралноста и еднаквиот третман на даночните обврзници.
Додаваат дека даночниот систем не смее да се користи како алатка за морална или социјална санкција, туку како инструмент за праведна распределба на товарот и за создавање еднакви можности.
ДОМ повикува на итно повлекување од оваа идеја и отворање на сериозна јавна дебата за правичен и недискриминаторски пристап кон демографските политики.
Длабоко сме уверени дека општеството не се гради со казни, туку со поддршка, еднаквост и почитување на човековото достоинство.