Педесетина илјади кутии од лекот Тамифлу, кој меѓудругото помага при лекувањето од грипот А(H1N1), се очекува денеска да пристигнат во државата.

Набавката на лекарствата е дел од стратегијата за навремено спречување на појава или ширење на новиот грип од кој Светската здравствена организација веќе прогласи пандемија.Епидемиолозите пак во меѓувреме ги повикаа граѓаните да преземат построги хигиенски мерки со цел да спречат ширење на болеста.Граѓаните пак кои имаат висока температура, кашлање и малаксаност веднаш по телефон треба да го известат матичниот лекар, Брзата помош или Заводот за здравствена заштита.Македонија резервира уште 150.000 илјади кутии тамифлу кај производителот Рош. Досега не е пријавен случај на заболен или пак, лице со симптоми на свински грип.

Инаку, бројот на идентификувани случаи на новиот грип од типот А (H1N1) во Велика Британија изнесува над 1.000, соопшти денеска  британското Министерство за здравство.Претставници на Министерството истакнаа дека во голем дел од случаите болеста поминува во лесна форма. Според нив, во Кралството има доволно вакцини против грип за успешна борба со пандемијата.Светската здравствена организација (СЗО) на 11 јуни прогласи пандемија на грипот А посочувајќи притоа дека дошло до зголемување на бројот на заразените и заболените лица во Велика Британија, како и во Австралија, во Јапонија и во Чиле. На територијата на Велика Британија најпогодени се Глазгов и неговата околина, како и шкотската област Клајд.Вирусот на грипот А се појави во април во Мексико и со голема брзина се прошири во светот. Досега болеста е регистрирана во 74 држави и притоа се заразени околу 30.000 луѓе. Од болеста 141 лице почина.