Власта на ДПМНЕ води политика на инает и не прифаќа ниту еден предлог на опозицијата за подобрување на животот на граѓаните, за поголеми плати, за почист воздух, за проекти низ општините. Ниту еден амандман на СДСМ во собраниската комисија ДПМНЕ не прифати, што досега се нема никогаш случено во историјата на македонското Собрание. Одбиени се амандманите за поголема плата за работниците. Одбиен се амандманите за покачување на платите на полицајците за 20%. Одбиен е амандманот за зголемување на платите на пожарникарите. Одбиен е амандманот за поголеми платите во образованието. Се што е предлог за покачување на плати го одбива. Мнозинството го враќа моделот во кој работниците ќе бидат само евтина работна сила, изјави Јована Тренчевска, пратеничка на СДСМ.

– Според податоците од Државниот завод за статистика, животниот стандард на граѓаните се влошува, сиромаштијата расте. Четиричлено семејство има потреба од 62.021 денари месечно за основни трошоци. Сето ова се индикатори дека народот има се помалку пари во џебовите. Работниците, полицајци, наставниците, пожарникарите, заслужуваат почит, достоинство и фер плати. Од друга страна додека ДПМНЕ одбива амандмани за поголеми плати во исто време ги зголемува парите во буџетот за мебел и луксузни возила за функционерите. За нови возила ќе се потрошат 7,5 милиони евра, за нов мебел 1,5 милиони евра, за договорни услуги 80 милиони евра. За службени возила и луксуз за дури 75% од парите се зголемени. Тоа се приоритетите на новата власт.

Во исто време, владејачкото мнозинство ги одбива и амандманите за еколошки проекти во општините, за набавка на автобуси, за реконструкции на улици. Буквално се одбива секој предлог на опозиција за проекти кои се важни за граѓаните. Само неколку примери: Одбиен е амандманот за пречистителна станица во Валандово и колекторскиот систем во Дојран, одбиени се амандманите за набавка на еколошки автобуси, за улицата Ленинова, за намалување на загадувањето, за локални патишта до Демир Хисар, за клучката кај Брвеница. Пред нас е пленарната седница и апелираме власта да се вразуми, да го прекине овој политички инает и да ги прифати амандманите кои се во интерес на сите наши граѓани. Пратениците на ДПМНЕ треба партиските директиви да ги заменат со ставање на интересот на граѓаните на прво место, да покажат интегритет и да делуваат за граѓаните а не за партијата – нагласи Тренчевска.

ВМРО-ДПМНЕ ги охрабрува институциите да продолжат во спроведување на законот и овозможување на правдата, во врска со денешната полициска акција, насочена кон поранешни директори на државната компанија „Електрани на Северна Македонија“ и на енергетски капацитети кои се под нејзина капа, меѓу кои и поранешниот генерален директор на ЕСМ Васко Ковачевски.

Пратеникот, Бране Петрушевски, изјави дека ВМРО-ДПМНЕ со години гласно зборуваше за криминалот во ЕСМ и РЕК.

„Двата енергетски комбинати и ЕСМ и РЕК Битола беа користени од функционерите на поранешната власт како претпријатија за испумпување на милиони преку тендери додека народот плаќаше скапа струја. ВМРО-ДПМНЕ ја предупредуваше власта на СДС и ДУИ да не ја крадат државата, и дека одговорност за криминалот ќе има. Сите наши апели не вродија со плод, СДС и ДУИ ја ограбија државата, но затоа сега одговорност ќе има и секој ќе одговара за тоа што правел“, рече Петрушевски.

Како што додаде, за да има милиони за тендери на Ковачевски, Заев и Филипче, цената на производство на струја ја качија од 33 евра за мегават час, на над 100 евра. Сето тоа го направија преку осакатување на системот, недоволна експлоатација на сопствен јаглен, скап увозен и неквалитетен јаглен, кој пак влијаеше на дефекти на постројките.

Најмалку десетина луѓе се уапсени во акцијата поврзани со РЕК Битола, ТЕЦ Осломеј и на ТЕЦ Неготино. Од МВР велат дека во тек е полициска акција и дека по завршувањето ќе бидат соопштени детали. Истрагата ја водат двајца обвинители од Обвинителството за борба против организиран криминал.

Американскиот Стејт Департмент објави сериозни обвиненија за значителна корупција против поранешниот вицепремиер Артан Груби и апелациониот судија Енвер Беџети. Овие обвинувања ја разоткриваат длабоката злоупотреба на службената положба и институциите за лични интереси, со прифаќање мито за манипулација на судски процеси, што е недозволиво во правна држава, велат од Македонски концепт.

Македонски Концепт ја поздравува одлуката на Соединетите Американски Држави да ја адресираат корупцијата на високо ниво и ја поддржуваме нивната решителност во борбата против овој глобален предизвик.

„Веруваме дека ваквите чекори се силен сигнал за сите кои ја злоупотребуваат власта и поттик за нашата земја да го засили сопствениот одговор кон корупцијата. Истовремено, бараме итно постапување на надлежните институции за расветлување на обвинувањата, одземање на мандатите и процесирање на случаите во согласност со законите. Македонија мора да покаже решителност и државност во справувањето со оваа сериозна криза. Борбата против корупцијата е основа за изградба на праведно општество и доверба во институциите. Без одлагање, потребни се конкретни мерки и силна политичка волја за враќање на владеењето на правото и правдата“, посочуваат од Македонски концепт.