Преговорите што се водат со Грција за разликите околу името не треба да влијаат врз процесот што Македонија го води против јужниот сосед пред Меѓународниот суд на правдата за прекршување на времената спогодба, смета министерот за надворешни работи Антонио Милошоски.

Шефот на макеоднската дипломатија смета дека спорот пред Хаг не е случај кој треба да и служи на политиката, туку на меѓународното право.„Очекувањата се дека овој процес во Хаг ќе го има својот тек без да биде процедурално попречуван од која било страна. Нормално е дека има различни коментари и политички изјави, а во тој контекс беше дадена изјавата на мојата грчка колешка. Но, имајќи ја предвид нивната внатрешна политичка ситуација, одредени турбуленции, тоа не не изненадува“, изјави Милошоски по презентацијата на Визниот центар во МНР за амбасадорите на земјите членки на ЕУ. Запрашан за коментар на тоа што Атина најавуват силни против докази во спорот, Милошоски вели:„Со овој случај сакаме да дадеме придонес во почитувањето на меѓународното право.Инаку, министерот за надворшени работи не одговори кога точно македонската страна ќе му одговори на медијаторот во спорот Метју Нимиц за последните модификации што тој им ги достави на Скопје и Атина при неговата посета во регионот на почетокот од месецот. Милошоски вели дека тоа ќе биде сторено „кога ќе дојде моментот“.„Имаме одреден концепт во која насока би можеле да се движиме. Заради доверливоста на самиот процес и препораките од посредникот Нимиц тоа да остане со што помалку подробности да не се нанесе штета на процесот, сметам дека кога ќе дојде моментот Македонија ќе биде подготвена да го пренесе својот одговор во овие рамки, да ја задржиме нашата проактивна вклученост во целиот негов ангажман. Сметам дека Република Македонија во иднина ќе покаже дека е страна во овој наметнат спор која може и сака да чекори кон едно приближување на ставовите и кон унапредување на односите меѓу двете земји“, рече министерот за надворешни работи. Милошоски не сакаше ни да ги коментира информациите за тоа дека е постигната согласност за промена на името за варијантата Република Северна Македонија. „Одговорот ќе дојде кога ќе биде време за тоа“, вели Милошсоки.Според него внатрешно – политички консталации во Република Грција влијаат на конструктивноста или неконструктивноста во самиот процес и се фактор кој што има свој удел во создавањето на една посложена консталација на целиот проблем, кој е наметнат од страна на Грција од почетокот на осамостојувањето на Македонија. За тоа на што се должи оптимизмот на Нимиц по средбите во Скопје и Атина шефот на македонската дипломатија упати на медијаторот, но го смета за добра вест.„Сметам дека во секој случај е добра вест што тој како искусен дипломат кој е долги години вклучен во овој билатерален проблем има едно чувство на оптимизам што во секој случај треба да се искористи“, изјави Милошоски.