Инклузивното игралиште во дворот на ОУ „Живко Брајковски“, кое Град Скопје го направи во соработка со Општина Бутел, денеска го пушти во употреба скопскиот градоначалник Петре Шилегов.

„Пред десетина дена во Општина Бутел отворавме сензорска соба, а денеска го пуштаме во употреба инклузивното игралиште чиишто реквизити се соодветни за користење од децата со и без попреченост“, нагласи Шилегов.

Игралиштето се простира на површина од 720 квадратни метри и е инвестиција вредна околу 3.900.000 денари дадени од Градот, а партерното уредување од околу 1.500.000 денари го обезбедила Општина Бутел.

„Ги охрабрувам и градоначалниците на другите општини да влегуваме во вакви заеднички реализации на проекти коишто се битни и покажуваат дека секој во нашиот град е важен“, рече Шилегов кој потесети дека исто инклузивно игралиште Град Скопје направи и во Карпош, а тоа беше пуштено во употреба претходниот викенд.

Директорот на пазарниот инспекторат, Стојко Пауновски, рече дека од четвртокот до сега издале 856 опомени за угостителите кои не ги почитувале протоколите, а откако по втор пат биле прекршени, инспекторите поднеле 26 кривични пријави.

Пауновски повика сите да се придржуваат до протоколите, за кои кажа дека е можно да се изменат со цел поголема контрола.

„Во четвртокот издадовме 856 опомени на угостителските субјекти, а во врска со спроведувањето на протоколите за работа. Од денот кога почнавме да ги казнуваме тие кои ќе ги прекршат протоколите, Пазарниот инспекторат има поднесено 21 кривична пријава и пет се во фаза на постапка, односно, денеска или утре ќе бидат доставени. Во викендот и вчера поднесени се 26 кривични пријави. Во истиот тој период констатирано е дека дел од угостителите кои почнале со работа во летните тераси, имаше и такви кои се нерегистрирани. Во текот на овие контроли, регистрирани се прекршувања по тој основ на 41 субјект за кои се изречени прекршочни пријави и издадени се платни налози“, рече Пауновски.

Според него, голем дел на угостителите ги почитуваат протоколите.

„Не сакаме по два ипол месеци затворени угостителски објекти, повторно да прибегнуваме кон мерката на затворање на оние кои нема воопшто да ги почитуваат протоколите. Сите овие протоколи, кои ги носи Владата, се пред се за заштита на тие кои го организираат угостителството, здравјето на оние кои ги посетуваат угостителските објекти. Ништо не е тешко ако сакаме нешто да спроведеме, бидејќи се работи за здравјето на сите“, додаде Пауновски.

Директорката на Државниот здравствен и санитарен инспекторат Ирина Бухова вели дека будно се следи состојбата со кластерите на новозаразени од коронавирусот што се појавија во конфекциските фабрики во Штип и во одредени правни субјекти во Тетово.

До вчерашниот ден од планираните 485 тестирања нa вработени во петте конфекциски фабрики, завршени се 100.

„Во Штип се издадени 55 решенија на лица кои се позитивни на коронавирусот за домашно лекување и самоизолација и 169 решенија на лица за здравствен надзор и изолација по однос на контакти“, рече Бухова.

Во Тетово, пак, од планираните 150 тестирања на лица вработени во одредени фирми, завршени се 70.

„Во Тетово, осум решенија се издадени по основ дека се инфицирани со коронавирусот за домашно лекување и самоизолација и 54 решенија по основ на контакти. Напоменувам дека овие бројки кои ги кажав се однесуваат само на позитивните и контактите кои се изолирани во конфекциите и правните субјекти во овие два града. Во оваа бројка не се внесени кластерите во фамилии или другите позитивни лица. Правните субјекти и текстилните фабрики покажаа исклучително почитување на протоколите со што веднаш по појавување на еден позитивен вработен сами престанаа со работа“, вели Бухова.

Таа го повика Министерството за внатрешни работи да врши контроли на лицата за кои се издадени решенија за изолација и за домашно лекување.

Бухова ги демантира информациите кои ги објавиле одредени медиуми, дека конфекциските фабрики во Штип се уште работат.

„Во моментов таму се земаат брисеви од вработените и присуството на вработените е исклучиво врз таа основа“, вели таа.