„МНР бара од Приштина да го расчисти инцидентот со палењето на македонското знаме“, се вели во денешното соопштение на Министерството за надворешни работи на Република Македонија

Во соопштението се наведува дека македонското знаме го запалиле малолетници надвор од фудбалскиот стадион во Приштина. „Косовската полиција работи на расчистување на инцидентот и наскоро ќе излезе со официјална информација“, изјави за МИА претставник на Министерството за внатрешни работи на Косово.Косовските медиуми објавија дека знамето било запалено за време на фудбалскиот натпревар меѓу „Приштина“ и „Влазними“. Според истите извори, на трибините можеле да се видат и пароли со антимакедонска содржина.Медиумите оценуваат дека инцидентот е последица на „незадоволството од невистините во Македонската енцикопедија“. Во врска со инцидентот со реакција излезе Министерството за надворешни работи на Република Македонија. Укажува дека „во вакви чувствителни моменти секој преземен чекор треба да биде во насока на ублажување на тензиите, а не нивно натамошно разгорување“. „Секој одговорен чинител во општеството би требало најостро да ги осуди ваквите екстремни постапки“, се вели во реакцијата од МНР. Канцеларијата за врски на Република Македонија во Приштина побара од официјалните власти на Косово да ги преземат сите законски мерки и сторителите да бидат идентификувани и соодветно казнети. „Заемната доверба и почит се градат на долг рок и секоја страна треба го даде својот придонес. Од Косово, како најмлада држава во регионот се очекува во вакви ситуации да го демонстрира својот капацитет и способност да дејствува на соодветен начин во правец на градење на добрососедски односи и развивање на регионалната стабилност“, укажува македонското Министерство за надворешни работи.