Дали ќе го бојкотирате референдумот за името што го најавува премиерот Никола Груевски? Тоа е главното прашање што амбасадори од држави-членки на Европската Унија му го поставуваат изминативе два дена на претседателот на опозициската СДСМ, Бранко Црвенковски

Тие тропнаа на вратата на опозицискиот лидер откако упатија јасни пораки до премиерот Никола Груевски дека референдум за решението кое ќе биде постигнато во преговорите со Грција за името нема да биде најплодно и дека одлуката треба да ја донесе политичкиот врв. Груевски, пак, децидно им одговори дека референдум ќе има без разлика што би можело да го одложи целиот процес во спорот со јужниот сосед. Веднаш потоа, се загрижија дали извесниот референдум ќе успее со оглед дека опозицијата почна да најавува бојкот.Црвенковски денеска се сретна со Ларс Петер Фреде, амбасадор на Кралството Шведска која е актуелен претседавач на Унијата, додека пак вчера во својот кабинет ги прими  амбасадорите на Унгарија, Холандија и Норвешка – Ференц Кекеси, Симоне Филипини и Кјетил Паулсен. Странците, според дипломатски извори, од опозицискиот лидер барале да ги допрецизира своите позиции во однос на преговорите меѓу Македонија и Грција во спорот со името. Конкретно, тие се интересирале колку е искрена неговата конструктивност во однос на позициите на Македонија по последното интензивирање на преговорите со јужниот сосед, и дали ќе повика на бојкот на референдумот. Странските дипломати отворено му соопштиле на Црвенковски што можеме да очекуваме како држава, од состанокот на Советот на министрите на ЕУ на 7 декември на кој ќе се расправа околу датумот за почеток на преговорите за полноправно членство во ЕУ доколку не се отворат преговорите и на повидок не видат решение во спорот.„Од страна на СДСМ беше истакнато дека клучната фигура за градењето на државните позиции во преговорите е премиерот Груевски и дека се надеваме дека тој на одговорен начин ќе ги донесе вистинските одлуки во насока да се искористи оваа историска шанса за нашата земја“, стои во вчерашниот соопштение од СДСМ за тоа што се случувало на средбите.Но, странските дипломати, како што велат изворите, побарале конструктивноста на Црвенковски да биде покажана на дело: ако референдум има и Владата води позитивна кампања, тогаш СДСМ да не биде таа што ќе го запре ваквиот процес.Според аналитичарите, ваквите средби помеѓу амбасадорите и лидерот на опозицијата биле вообичаени и редовни и најлесен начин директно да се информираат за ставовите на политичките актери во државата. Не препознаваат дипломатски притисок за да не се бојкотира референдумот со името, но сметаат дека од средбите дипломатите ќе добијат слика за спорните точки кои би довеле до нова блокада на преговорите со Грција, а со тоа и на евроатланските процеси.„Станува збор за редовни средби. Вообичаено е дипломатите да се запознаат со тоа кои се ставовите на сите чинители на политичкиот живот во државата. Средбите се начин тие да ги лоцираат точките од интерес и за тоа каде постои, а каде не расположение околу преговорите што се водат за името. Се среќваат со оние кои го дизајнираат политичкиот амбиент, вклучително и Црвенковски како претседател на најголемата опозициска партија“, вели Звонимир Јанкулоски, професор по меѓународно право. Македонија по интензивирањето на преговорите и новите средби помеѓу преговарачите и медијаторот Метју Нимиц што се најавуваат за втората половина од месецов, на 7 декември очекува датум за почеток на преговорите, а до Нова година и реализирање на одложената покана да стане членка на НАТО.