Македонија
Продлабочување на економската соработка со Хрватска

Хрватска и понатаму ќе ја поддржува Македонија на патот на евроинтеграциите со што ќе градиме заедничка иднина, потврди хрватската премиерка Јадранка Косор, при денешната официјална посета на Скопје
За отвореното прашање на евроинтеграциите, за споделување на искуствата, за економска соработка, како и за прашањето на малцинствата во Хрватска и во Македонија, разговарале денеска премиерите на двете земји, Никола Груевски и Јадранка Косор.
„На разговоерите освен што беше отворено прашањето за нашите евроатлански интеграции и поддршката во тој правец, разговаравме и за можноста во иднина кога тоа ќе биде потребно, за споделување на искуствата со Хрватска во однос на одредени нивни искуства коишто ги имаат стекнато во овој период кога го изодуваат патот кон Европа“, рече премиерот Никола Груевски на денешната прес-конференција, по средбата со хрватската колешка Косор.
Билатералната соработка на економски план е одлично оценета од двајцата премиери, но ја оставаат отворена можноста за продлабочување на соработката.
„Хрватските бизнисмени се добредојдени во Македонија, некои од нив веќе најавуваат скорешно влегување на пазарот во Македонија, некои влегоа со купување акции во наши компании и тие на нашиот пазар се пречекани како домашни и имаат многу добар прием. Политичките односи помеѓу Македонија и и Хрватска позитивно се одразуваат и на економските односи“, рече Груевски.
Некои фирми од двете земји имаат мали потешкотии во водење на бизнисот, а за таа цел премиерите Косор и Груевски договориле да формираат техничка екипа, којашто ќе се обиде да им помогне да ги разрешат тие помали проблеми.
Хрватска како членка на НАТО и на чекор пред влез во Европската Унија, ќе ја поддржи Македонија на евроатланскиот пат, потврди хрватската премиерка Косор.
„Неодамна се деблокирани хрватските преговори за влез во Европската Унија, за продолжување на преговорите и за конечно нивно завршување. Јас и тогаш реков и денеска ќе го повторам тоа овде во Скопје, дека деблокадата на тие преговори е одличен знак, знак на охрабрување, поддршка за целиот југоисточен регион на Европа, на сите земји кои тежнеат кон евроатланскиот пат“, рече Косор.
Јадранка Косор ги покани македонските граѓани во сезоната 2010 година, повторно да ја одберат Хрватска како дестинација за летување, затоа што годинава, иако беше кризна година, сепак, Хрватите забележале пораст на македонски туристи од 3 отсто.
Попладнево, хрватскиот и македонскиот премиер ќе присуствуваат на средба со бизнисмените и со стопанските комори, на што гледаат како на шанса повеќе за склучување на нови партнерства, договори, зголемување на трговијата и инвестициите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Пливачите останаа на цедило – министерот Борко плива во тишина и безидејност“, велат од партијата Левица

„Министерот за спорт, Борко Ристовски се нама огласено по затворањето на базенот „Борис Трајковски“, а ветуваше брзо и ефективно решавање на проблемите во пливањето. Стотици пливачи и ватерполисти останаа без соодветни тренинзи“, велат од партијата Левица.
„По обичај, цената за пропустите ја плаќа некој друг, во случајов тоа се македонските пливачи кои се принудени да се снаоѓаат на свој начин користејќи ги останатите базени во државава за да ја одржуваат формата и неопходните тренинзи за што се потребни дополнителни трошоци кои пливачите и нивните родители ги даваат од сопстевниот џеб.
Ова би требало најдобро да го знае министерот Борко Ристовски кој сѐ уште се нема произнесено во јавноста во врска со затворањето на базенот во С.Ц. Борис Трајковски, не нудејќи притоа никаква алтернатива за спортистите и клубовите засегнати со овој проблем.
Го повикуваме министерот да се одважи од вторите редови на една од прес конференциите на Премиерот Мицкоски, да ги соопшти планот, динамиката и временската рамка за најавеното реновирање на базенот, што е од исклучителна важност за развојот на пливачките спортови во Македонија.
Самиот Борко Ристовски ветуваше брзо и ефективно решавање на проблемите во пливањето, посебно акцентирајќи го овој спорт.
Упатуваме апел до министерот за спорт да пристапи со директна финансиска помош до клубовите, пливачите и ватерполистите и да изготви решение за моменталната ситуација за која не се знае до кога ќе трае.
Спортистите бараат тренинзи во соодветни термини и во соодветен број стази. Тоа се истите спортисти на кои им претстојат големи натпреварувања и на чиј грб се рекламира министерството за спорт кога ја претставуваат државата.
Спортистите како најголеми амбасадори на земјава во светот го заслужуваат тоа“, се додава во соопштението на партијата Левица.
Македонија
Обвинение против 59-годишник за полов напад врз дете: го допирал малолетникот во парк во Чаир

Основното јавно обвинителство Скопје, по спроведена претходна постапка, поднесе обвинение против 59-годишник кој се товари за полов напад врз малолетник, согласно член 186 став 7 во врска со став 2 и став 1 од Кривичниот законик.
На 24.08.2024 година, во парк во населбата Чаир, обвинетиот извршил други полови дејствија врз дете кое во тој момент имало наполнети 15 години. Започнал да го допира детето, но тоа му ја фатило раката и се заканило дека ќе повика полиција. Во тој момент обвинетиот се обидел да избега и да се скрие во влез од зграда. Детето ја затворило вратата од влезот и повикало полиција која го привела обвинетиот.
За обезбедување на обвинетиот во текот на постапката на сила се мерки на претпазливост определени од судијата на претходна постапка од Основниот кривичен суд Скопје, кои вклучуваат забрана за напуштање на живеалиште/престојувалиште, обврска за јавување кај надлежен државен орган, одземање на патна и друга исправа за преминувањe на државната граница и забрана за воспоставување контакт со оштетениот.
Македонија
Директорот на Царина од Анкара: Зајакнување на оперативната соработка и заедничко профилирање на ризици со Царината на Турција

Зајакнување на царинската соработка помеѓу Македонија и Турција за што ќе се потпишат и меморандуми за соработка, воспоставување директни комуникациски канали помеѓу Секторите за контрола и истраги, размена на информации во реално време и креирање заеднички профили на ризик за специфични стоки. Ова е договорено на вчерашната средба во Анкара со министерот за трговија на Турција Омер Болат и директорите на Директоратите за Царина и Царинска контрола и истраги, на која директорот на Царинска управа Бобан Николовски како дел од делегацијата на министерката за финансии Гордана Димитриеска Кочоска имаше свое обраќање.
„Оперативната соработка и ефективната меѓународна координација и размената на информации во реално време преку воспоставување директни комуникациски канали, како и креирање заеднички профили на ризик, е суштински во борбата со транснационалниот криминал, како и во спречување на обидите за царински измами. Ваквиот пристап овозможува навремено откривање и спречување на нелегалните активности и зајакнување на безбедноста на границите. Договоривме потпишување на меморандуми за соработка, каде ќе се дефинира институционалната рамка за заедничко делување. Ваквите чекори се многу значајни бидејќи истите испраќаат позитивен сигнал до странските инвеститори и деловната заедница“, вели директорот Бобан Николовски.
Николовски воедно истакнува дека е постигната согласност за организирање на заеднички обуки фокусирани на ракување со разузнавачки информации, подобрување на аналитичките капацитети, како и размена на најдобри практики и искуства во областа на видео надзорните системи и ИКТ решенијата. Дополнително, договорено е одржување редовни експертски состаноци, со цел унапредување на капацитетите за откривање на царински измами и ефективно спречување на корупција.