Полска и’ дава отворена поддршка на Македонија за интеграција во ЕУ и НАТО, го признава нејзиното уставно име и смета дека е нефер да и’ се поставуваат посебни специјални услови, различни од другите земји, за членство во евроатлантските структури

Ова го истакна Анджеј Халицки, претседател на Комисијата за надворешна политика во полскиот Сејм (Парламентот) по денешната средба во Варшава со македонскиот министер за надворешни работи, Антонио Милошоски.Претседателот на полската парламентарна комисија Халицки, за МИА изјави дека ставот за поддршка на Македонија соопштен и претходно од страна на полскиот претседател и Владата, за време на Самитот на НАТО во Букурешт, беше јасен. „Ние го користиме уставното име без некои други услови. Целосно е нефер да се поставуваат некакви специјални услови од други земји-членки. Членките кои сакаат да се чувствуваат посилни од други земји и општества, не ги исполнуваат фундаменталните европски стандарди. Правилата се исти за сите, и за оние што се внатре и за оние што се надвор, но сакаат да бидат внатре“, рече Халицки.Шефот на македонската дипломатија рече дека Македонија е задоволна од отворената поддршка што ја добива од Полска, како и од полската политика на отворени врати и вреднување на постигнатите резултати и оти кога тие се постигнати, секој кандидат треба да има шанса да стане дел од ЕУ и да придонесе за заедничките цели на модерната европска нација. Милошоски оваа порака ќе му ја пренесе попладнево и на неговиот полски колега Радослав Шикорски од кого исто така ќе побара Полска да ја поддржи Македонија и да ја следи препораката на Европската комисија за почнување преговори за пристап во ЕУ на декемврискиот самит на Унијата.  Македонскиот минстер за надворешни работи оцени дека билатералните односи меѓу двете земји се одлични и оти придонес за тоа дава и полскиот Параламент. Притоа тој најави дека се очекува во почетокот на следната година претседателот на македонското Собрание да биде гостин на полскиот Парламент. „Ќе се согласам со министерот дека нашите билатерални односи се навистина добри. Ние би сакале што поскоро Македонија да стане дел од Европската Унија, како и членка на НАТО“, додаде Халицки. За време на престојот во Варшава предвидено е министерот Милошоски да одржи предавање на тема „Перспективите за членство во ЕУ на земјите од Балканот – случајот на Република Македонија“, во организација на Центарот за источни студии и институтот „ДЕМОС – Европа“.Македонија и Полска имаат традиционално пријателски билатерални односи. Полска, која стана членка на Европската Унија во 2004 година, ја поддржува Република Македонија во евроатлантските интеграциски процеси и во 2005 година ја призна под уставното име. Полска е една од земјите од кои Македонија ќе црпи искуства за претстојните преговори за влез во Унијата во делот на јавната администрација, и тоа според Холандско-полскиот Утрехт модел. Се очекува во април идната година во Варшава да се одржи конференција на која главна тема ќе бидат токму овие полски искуства, поглавјата за заедничка надворешна и безбедносна политика и за правда и безбедност. Отворени прашања меѓу двете земји нема, но обострана оценка е дека од особена важност е развојот и интензивирањето на економската соработка.