Градоначалникот на Скопје, Коце Трајановски, во Музејот на Град Скопје ги додели наградите на најдобрите угостителски објекти за 2009 г. За најдобар во големата конкуренција е избран ресторанот „Лира“

„Многу ми е драго што Градот покажа ваква иницијатива за оценување на работата на угостителските објекти, а ми се допаѓаат и критериумите под кои беше оценувана таа работа. Постоиме веќе 14 години и ова е втора година како ја добиваме оваа награда“, изјави Влатко Милев од ресторанот Лира.Покрај наградата за најдобра гостилница што ја доби гостилницата Лира, во категоријата ресторани наградата ја доби Три бисери, а покрај него и мексиканскиот ресторан Амигос и ресторанот Гурмет се најдобрите за оваа година, а во категоријата гостилници, првите три плакети им припаднаа на гостилниците Лира, ИВ и Идадија.Истражувањето од страна на тајни клиенти било спроведено од 15 октомври до 15 ноември оваа година, а биле опфатени 50 ресторани и 50 гостилници во Скопје. Спроведени биле вкупно 300 посети, по три во секој угостителски објект.Во просториите на Музејот на Град Скопје денес беа доделени наградите за „Најдобар угостителски објект меѓу најдобрите“. Наградите беа поделени во две категории: гостилници и ресторани. Оваа традиционална манифестација е во организација на Град Скопје, а е поддржана од SWOT Research.„Мислам дека ова е најдобриот начин со објективно оценување да се одреди најдобрата услуга на угостителите во нашиот град. Ваквите манифестации се полезни, зашто служат како начин на вреднување на квалитетот на услугата, но воедно значат и поттик и мотив за натамошно подобрување на изгледот на објектите, но и подобрување на квалитетот на услугата. Странците кои го посетуваат нашиот град, треба покрај другите нешта да го паметат токму по добрата храна и услуга, специфична само за нас“, истакна скопскиот градоначалник Коце Трајановски. Раководителот на Секторот за локален економски развој, Слободан Ќосев, смета дека ваквите манифестации имаат единствена цел, да се издвојат најпрестижните угостители во Скопје, коишто пак би претставувале пример за сите останати.  „Објектите се испитуваат во текот на еден месец, од 15 октомври до 15 ноември, а се испитуваат понудата и квалитетот на угостителите во градот. Испитувањата се спроведуваат според неколку критериуми, меѓу кои: прв впечаток или контакт, изглед на објектот, изглед на внатрешниот простор, изглед на барот, услугата на келнерите, квалитетот на храната и завршен контакт“, рече Ќосев. Манифестацијата „Најдобар угостителски објект меѓу најдобрите 2009“ се одржува вторпат, во организација на Градот Скопје.