Во рамките на дводневната посета на Скопје, официјална делегација од францускиот град Дижон, предводена од заменикот градоначалник Пјер Прибетиш и шефот на одделот за меѓународна соработка Филип Сартори, се сретна со скопскиот градоначалник и со претставници од градската администрација

„Навистина ми е драго што дојдовте сега кога се одржува Саемот на општини во Скопје и мислам дека имавте можност не само да го видите Скопје, туку да ги запознаете и сите општини во нашата држава собрани на едно место. Би сакал да ја искористам нашата средба за да ги пратам моите срдечни поздрави до Градоначалникот на Дижон и да ви се заблагодарам за досегашната добра заедничка соработка. Чест ми е што Градот Скопје е дел од мрежата на градови на Франкофонијата“, истакна скопскиот градоначалник Коце Трајановски заблагодарувајќи им се на гостите од Дижон за досегашната, како што ја оцени, одлична соработка меѓу двата збратимени града.Од своја страна, пак, заменикот градоначалник Пјер Прибетиш нагласувајќи ја добрата соработка меѓу Дижон и Скопје, изрази желба и надеж дека со ваквите средби таа ќе се продлабочува.„Нашето збратимување трае веќе педесетина години, и тоа е резултат на желбата на нашиот поранешен градоначалник Кир, кој уште во 1961-та сакаше  да ја отвори границата на Франција за државата од источна Европа. Се надевам дека во 2011-та свечено ќе го прославиме педесетгодишниот јубилеј од нашето збратимување“, рече Прибетиш.На средбата присуствуваа и вршителката на должноста амбасадор во Скопје, Изабел Гуиснел и Бранко Чобанов, аташе за култура во Француски центар за соработка.Во средата ден двочлената делегација од Дижон одржа состаноци со претставници на неколку сектори од Град Скопје, на кои присуствуваа и Корин Далансон, аташе за институционална соработка како и Јохан Урес, директор на Францускиот центар за соработка „Жан Моне“ и советник за култура и соработка во Амбасадата на Р. Франција во Република Македонија. На состаноците се разговараше на теми од меѓународната соработка, од областа на културата, заштита на животната средина, планирањето и уредувањето на просторот, а беа потенцирани и можните начини на продлабочување на соработката на овие полиња, со што Скопје и Дижон активно би работеле на издигнување на културната размена на едно повисоко ниво.