Доколку утре се одржат парламентарни избори, за ВМРО-ДПМНЕ би гласале 25,2 проценти, а најголемата опозициска партија СДСМ би добила поддршка од 8,4 проценти од гласачите, покажуваат резултатите од истражувањето на Институтот „Павел Шател“ во периодот од 7 до 11 овој месец

Од вкупно анкетираните 1.112 испитаници,  за ДУИ би гласеле 7,1 процент, за Нова Демократија  3,1, а за ДПА 2,1. Под еден  процент би добиле ДОМ и ЛДП односно 0,2 отсто, како и СПМ, ВМРО-НП, НСДП и Обединети за Македонија со по 0,1  процент. Според истражувањето, 24,3 проценти од испитаниците одговориле дека не знаат или пак немале одговор за кого би гласале, додека 27,5 проценти не би гласале за ниту една политичка партија. На прашањето во кој политичар имаат најголема доверба, 26,1 процент од анкетираните граѓани го посочиле лидерот на ВМРО-ДПМНЕ и актуелен премиер Никола Груевски, а 8,5 проценти најмногу му веруваат на претседателот на СДСМ Бранко Црвенковски. Во Али Ахмети најголема доверба инмаат 6,7 проценти, во Имер Селмани, претседателот на Нова демократија 2,7, а за првиот човек на ДПА Мендух Тачи 2 проценти од анкетираните. Одговор на прашањето во кој политичар имаат најголема доверба, не знаеле или не понудиле 16,7 проценти, а  31,2 проценти рекле дека ниту еден од политичарите не ја ужива нивната доверба. Со анкета за рејтингот на политичките партии излезе и Институтот за социјална демократија Прогрес, спроведена врз 1100 испитаници на 12 и 13 овој месец. Според нивните резултати, највисок рејтинг има ВМРО-ДПМНЕ 19 проценти, СДСМ 13, ДУИ 7, Обединети за Македонија 1,5, а Нова Демократија 1 процент. Со рејтинг под еден отсто се ЛДП, НСДП, ДОМ и СПМ.